Máselen, tańǵy 7.00 men 13.00 saǵat aralyǵynda Almaty oblysyndaǵy saılaýshylardyń 30 paıyzy daýys berse, tús aýa bul kórsetkish 60 paıyzǵa jetken.
Túske deıin saılaýshylardyń arasynda jastar belsendi bolsa, qazir orta jastaǵy turǵyndar daýys berý úshin ýchaskelerge kelip jatyr. Olardyń qatarynda úıden daýys bergen soǵys jáne eńbek ardagerleri de bar.
Máselen, Aqsý aýdanynda turatyn Gavrıl Moıseev sol qatardan. Bir ǵasyrǵa jýyq jasaǵan qart aımaqtaǵy sanaýly soǵys ardageri retinde el qurmetine bólengen. Búgin Gavrıl Stepanovıch turǵylyqty meken jaıy boıynsha úıinen daýys berdi. Jalpy, aýdandyq saılaý komıssııasyna úıden daýys berýge 86 ótinish kelip túsken. Osy sátke deıin 24 609 adam daýys berip úlgerdi.
Sondaı-aq, Panfılov aýdanynda turatyn eńbek ardageri, 101 jastaǵy áje Naǵıman Shalabaeva da óz úıinde daýys berdi. 12 balany tárbıelep, ósirgen keıýana búgingi kúnge deıin qansha ret daýys bergenin bilmese de, árqashan saıası naýqannan esh qalǵan emes. Jáne osy óńirdegi eńbek ardageri, Sosıalıstik Eńbek Eri Kúlásh Aıtjanova apa da zańdy tańdaý quqyǵyn úıinde jasady.
«Bıyl erekshe jyl boldy. Saılaý kezinde kóppen bolýshy edim. Endi úıden shyqpaı daýys berdim. Ár azamat mindetti túrde daýys berýi kerek. Bul elimizdiń bolashaǵyn tańdaýǵa berilgen múmkindik», deıdi Eńbek Eri.
