Sýretterdi túsirgen Erlan OMAR, «EQ»
Olardyń aıtýynsha, saılaý baıqaýshylary 1 qańtardan bastap daıyndyqtan ótken. Olardy daıyndaý úshin barlyq óńirde tájirıbeli trenerler onlaın jáne oflaın trenıng, semınarlar ótkizdi, sondaı-aq Ortalyq saılaý komıssııasynyń ókilderi de atsalysqan. «Búgin saǵat 07:00-den bastap respýblıka boıynsha 9 559 saılaý ýchaskesi ashylyp, baıqaýshylarymyz jumysyn bastady. Baıqaýshylardy 2020 jyldyń 1 qańtarynan bastap daıyndadyq. Baıqaýshylar quramyna Kásipodaqtar federasııasy, Qazaqstan Azamattyq alıansy jáne 2000-nan astam úkimettik emes uıym ókili kirdi. Baıqaýshylardyń jalpy sany – 19 650», deıdi Saılaýdy beıpartııalyq baıqaý ortalyǵynyń basshysy Baný Nurǵazıeva.
Kásipodaqtar federasııasy tóraǵasynyń orynbasary Nurlan О́teshov baıqaýshylardyń jumys barysy týraly aıtyp berdi. «Saǵat 09:00-de respýblıkalyq shtab oblystyq shtabtardan aqparat jınap qoıdy. Saılaý ýchaskelerinde baıqaýshylar ártúrli nusqada jumys istedi. Mysaly, bir saılaý ýchaskesinde bir baıqaýshy kúni boıy jumys istese, taǵy bir saılaý ýchaskesinde túske deıin bir baıqaýshy, tústen keıin ekinshi baıqaýshy aýysyp otyrdy. Keıbir saılaý ýchaskesinde úsh baıqaýshydan jumys istedi. Eki saǵat saıyn aqparat taratyp otyrýǵa tyrystyq», deıdi ol.
«Kásipodaqtar federasııasynyń respýblıkalyq shtabynyń málimetinshe, quqyq buzýshylyqtardyń kóbi adamı faktorǵa baılanysty bolǵan. Onyń ishinde bir otbasy bolyp kabınkaǵa kirip ketý sııaqty oqıǵalar kezdesedi. Degenmen olar saılaý prosesine asa qatty kedergi jasaıtyn kemshilikter emes», dedi Nurlan О́teshev.
Respýblıkalyq shtab aqparatyna súıensek, saılaý ýchaskelerindegi keıbir baıqaýshylar áriptesterimen sózge kelip qalǵan jaıttar da anyqtalǵan. «Keıbir baıqaýshylar ózderiniń narazylyǵyn kórsete me, álde basqadan bilimdi ekenin tanytqysy kele me, áıteýir basqa baıqaýshylarǵa ózderiniń is-áreketimen kedergi jasaǵany málim boldy. Osyndaı jaǵdaı bir emes, birneshe oblysta tirkeldi. Oǵan da bárimiz baǵa berýge daıynbyz. Eń birinshiden, aımaqtardan túsip jatqan málimetterge súıensek, asa úlken zańbuzýshylyq joq. Azamattar daýys berý quqyǵyn tolyq paıdalandy», dedi N.О́teshev.
Saılaýdy beıpartııalyq baıqaý ortalyǵynyń jetekshisi, Qazaqstan Azamattyq alıansynyń prezıdenti Baný Nurǵazıeva saılaýshylardyń belsendiligi joǵary bolǵanyn málimdedi.
«Buryn da aıtyp ótkenimdeı, búgin Qazaqstannyń búkil aýmaǵynda Beıpartııalyq baıqaý ortalyǵynyń baıqaýshylary eldegi saılaý naýqanyna qatysty. 10 myńǵa tarta saılaý ýchaskesinde shamamen 20 myń baıqaýshy jumys istedi. Osy rette kelesi máselelerdi atap óter edim: meniń jáne áriptesterimizdiń oıynsha, osy saılaýda saılaýshylardyń belsendiligi joǵary boldy», dedi Baný Nurǵazıeva Saılaýdy beıpartııalyq baıqaý ortalyǵynda ótken baspasóz máslıhatynda.
Ortalyq basshysynyń aıtýynsha, keshe ózi de túske deıin elordadaǵy №60 saılaý ýchaskesine baryp daýys bergen jáne sol kezde azamattardyń kezekte turǵanyn kóripti. «Búgingi tańda bizdiń qoldaǵy málimetke sáıkes, tizimde tirkelgen saılaýshylardyń jartysynan kóbi daýys berip úlgergen. Osy oraıda zańbuzýshylyqtyń da tirkelgenin atap ótý kerek. Naqtyraq aıtqanda, keı saılaýshylardyń tutas otbasy úshin daýys bergisi kelgenderi kezdesti. Odan bólek saıası partııalardyń ókilderi daýys berýge kelgen kezde taǵyp kelgen maskalarynda partııalarynyń jazýy turatyn jaǵdaılar da boldy. Sondaı-aq provokasııalyq sıpattaǵy áreketter de qylań berdi. Máselen, keıbir baıqaýshynyń óz áriptesterimen sóz talastyryp, kedergi keltirgisi keletinderi boldy. Meniń oıymsha, mundaı áreketter baıqaý barysyna zııanyn tıgizedi», dedi ol.
Osy rette Baný Nurǵazıeva naqty mysal keltire ketti. Onyń aıtýynsha, Petropavl qalasyndaǵy №587 saılaý ýchaskesinde Qazaqstan jastary aqparat qyzmetiniń (MISK) ókili baıqaýshylardyń bárine kedergi keltirip, beınetúsirilim júrgizip, saılaý barysyna qatysty daýystap pikir bildire bastaǵan. Baıqaýshylardyń, saılaý komıssııasy tóraǵasynyń eskertýin elemegen. Osyǵan baılanysty baıqaýshylar birigip akt toltyryp, komıssııa tóraǵasynan ony syrtqy shyǵarýdy ótinýge májbúr bolǵan.
