Kolledjder belgili bir mamandyqtar boıynsha stýdentterdi oqytqanymen, beıini men bilim berý qyzmetine qoıylatyn biliktilik talaptaryna sáıkes bolmaı shyqty. Osyǵan baılanysty BǴM tarapynan lısenzııalardy qaıtarý jumystary júrgizildi.
Bilim berý baǵdarlamalarynyń sapasy, pedagogıkalyq jáne oqytýshylar quramynyń jetkiliksizdigi, oqý úrdisin júzege asyrý úshin qajet materıaldyq-tehnıkalyq bazanyń jáne oqý-zerthanalyq jabdyqtardyń bolmaýy syndy buzýshylyqtar da oryn alǵan.
Bul kolledjderdiń stýdentteri basqa oqý oryndaryna aýystyrylyp, oqytýshylar jumysqa ornalastyryldy.
«Biz osy baǵyttaǵy jumysty joǵary oqý oryndarynda da, kolledjderde de júrgizip jatyrmyz. Memleket basshysy bilim berý sapasyn arttyrý boıynsha tapsyrma bergen bolatyn. Shyn máninde, elimizde sapaly bilim beretin kolledjder kóp, biraq bári birdeı emes. Osy oraıda júıeli jumys júrgizilip jatyr, degenmen qatań sharalar da qabyldanady. Eger medısınalyq kolledj qarjygerlerdi, býhgalterler men programısterdi, al agrotehnıkalyq kolledj – mektepke deıingi uıymdardyń tárbıeshilerin, qurylys kolledji – dene shynyqtyrý muǵalimderin jáne t.b. baǵyttar boıynsha mamandardy daıarlasa, sapaly bilim berý týraly qalaı aıtýǵa bolady? Tipti bul oqý oryndarynyń qajet bazasy, tıisti kadrlary men oqý úrdisine qajet jabdyqtary da joq bolǵanyn aıta ketken jón», – dedi QR BǴM Bilim jáne ǵylym salasynda sapany qamtamasyz etý komıtetiniń tóraıymy Gúlzat Kóbenova.
