AHQO qarjylyq qyzmetter kórsetýdi retteý jónindegi komıtetiniń habarlaýynsha, 2020 jyldyń qyrkúıeginde tirkeý prosesi tolyqtaı onlaın rejimge kóshken. Tıisinshe, tirkeý merzimi 7 kúnnen 1 kúnge deıin qysqardy.
Sonymen qatar ınvestısııalardy satý jáne satyp alý boıynsha ártúrli platformalarǵa qatysty 5 jańa qarjylyq qyzmet engizilgen. Eske sala keteıik, AHQO-da usynýǵa bolatyn qarjylyq qyzmetterdiń jalpy sany – 35. Budan bólek, keptıvti saqtandyrýdyń 3 jańa formasy iske qosylǵan.
Koronavırýs pandemııasyna baılanysty AHQO-da retteýshilik baǵytyndaǵy qoldaý sharalary engizildi. Bul qarjy ortalyǵy alańynda jumys isteıtin bıznes qaýymdastyqqa qıyn kezeńderde óziniń negizgi basymdyqtaryna nazar aýdarýǵa múmkindik berdi. Sondaı-aq negizgi kapıtalǵa qoıylatyn talaptar men ınvestısııalyq kompanııalardyń ótimdilik talaptary ońtaılandy.
FinTech Lab-ta 8 jańa fırma tirkelgen. Búginde barlyǵy 30 fırma bar. Olar kraýdfandıng, aqsha qyzmetteri, sıfrly aktıvter jáne t.b. qyzmetter usynady. Qarjylyq qyzmetter kórsetýdi retteý jónindegi komıtet AHQO men Qazaqstannnyń sıfrly aktıvteri salasyndaǵy zańnamalyq aktilerdiń talaptaryn úılestirýge yqpal etti.
Halyqaralyq qatynastar baǵytynda da aýqymdy sharýa tyndyryldy. Atap aıtqanda, kópjaqty eki kelisimge qol qoıylǵan. Iаǵnı IOSCO keńeıtilgen ózara túsinistik týraly memorandým jáne saqtandyrý qadaǵalaýshylarynyń halyqaralyq qaýymdastyǵynyń (IAIS) kópjaqty ózara túsinistik týraly memorandýmy bekitildi. Eki kelisim de naryqtardyń durys jumys isteýi men qarjylyq turaqtylyqty qamtamasyz etý úshin dúnıejúzilik qadaǵalaý salasyndaǵy yntymaqtastyq aıasyn keńeıtedi.
AHQO soty men Halyqaralyq tórelik ortalyǵy qyzmetin 2018 jylǵy 1 qańtarda bastaǵan edi. Osy kúnge deıin jalpy 296 isti oıdaǵydaı sheshken. Onyń ishinde 291 is 2020 jyldy qarastyrylǵan.
– AHQO sotyna 12 is berildi jáne 9 sheshim shyǵaryldy. Halyqaralyq tórelik ortalyǵynda tórelik talqylaý men medıasııany talap etetin 282 is sheshildi. Tórelik isterdiń sany edáýir ósken. Biraq isterdiń kópshiligi medıasııa arqyly sheshimin tapty. Halyqaralyq tórelik ortalyǵynda daýlardy medıasııa jolymen sátti retteý nátıjesinde ister boıynsha odan ári tórelik etý nemese sot talqylaýy qajettiligi azaıǵan. Isterge 11 eldiń taraptary qatysty. Onyń ishinde Qazaqstan, Reseı, Qytaı, О́zbekstan jáne Ulybrıtanııa sekildi memleketter bar. Negizinen daýlar boryshtyq mindettemelerge, ózge de qarjy máselelerine, qyzmetter kórsetýge, eńbek qatynastaryna jáne múlikke (onyń ishinde jer menshigine) baılanysty máselelerge qatysty boldy, – dep habarlady AHQO soty men Halyqaralyq tórelik ortalyǵy.
Pandemııaǵa baılanysty AHQO soty men Halyqaralyq tórelik ortalyǵy jumysty tolyqtaı onlaın rejimge kóshirgen. Barlyq daýlar elektrondy túrde sheshildi. Onyń bári eJustice elektrondyq sot isin júrgizý júıesin qoldana otyryp júzege asyryldy. Barlyq daýlardy retteý jáne sheshý, sotqa deıingi jáne sot tyńdaýlaryn ótkizý úshin zamanaýı beınetehnologııalar qoldanylǵan.
AHQO sotynda taraptardyń múddelerin sotta qorǵaý úshin 222 zańger tirkelgen. Olardyń arasynda AQSh, Ulybrıtanııa, Eýropa, Ortalyq Azııa, Afrıka, Azııa, Aýstralııa jáne Jańa Zelandııadan tirkelgen 23 eldiń (25 ıýrısdıksııa) zańgerleri bar.
– 2020 jyl AHQO soty men Halyqaralyq tórelik ortalyǵy úshin aıtýly jyl boldy. Jahandyq COVID-19 pandemııasyna baılanysty týyndaǵan qıyndyqtarǵa qaramastan, daýlardy sheshý qyzmetteri búkil álemdegi bıznes pen isker adamdar úshin óziniń tartymdylyǵyn dáleldedi. Jańa seriktestik qarym-qatynastardy qurý jáne oqytýdyń aýqymdy baǵdarlamalaryn júrgizý nátıjesinde biz sot isteriniń sanyn edáýir ulǵaıtýǵa, sot jáne tórelik sheshimderdi tabysty oryndaýǵa qol jetkizdik. Sondaı-aq Qazaqstan men Ortalyq Azııanyń zań jáne iskerlik qoǵamdastyǵyn damytýǵa eleýli úles qostyq. Bizdiń qyzmetimizdiń osy kezeńinde basqa halyqaralyq qarjy ortalyqtaryndaǵy daýlardy retteý jónindegi uqsas ortalyqtarmen salystyrǵanda, nátıjemiz kútkenimizden asyp tústi, – deıdi AHQO sotynyń jáne Halyqaralyq tórelik ortalyǵynyń tirkeýshisi jáne apparat basshysy Krıstofer Kempbell-Holt.
