Eki jyl buryn bolǵan myna bir oqıǵa onyń bul oıynyń durystyǵyn dáleldeı túskendeı. Buryn aıyrylysqan erli-zaıyptylarǵa qatysty istiń (burynǵy áıeli burynǵy kúıeýin óltirýge tapsyrys bergen) ashylýynda jas tergeýshiniń sheberligi anyq baıqaldy.
– Bul oqıǵa 2019 jyly shilde aıynda bolǵan. 48 jastaǵy áıel aıyrylysqan kúıeýin óltirý úshin Túrkistan oblysynyń turǵynyna tapsyrys beredi. Bul qyzmetine 20 myń AQSh dollaryn berýge ýáde etipti. Biraq buryn sotty bolǵan ol azamat usynysqa kelisken syńaı tanytqanymen artynsha bizge aryzdandy. Qandy qylmysty boldyrmaý úshin áreket ete bastadyq, – deıdi tergeýshi.
Bir qaraǵanda bári ońaı sııaqty. Tapsyrys berýshi de, aýyr qylmysty «oıdaǵydaı oryndap» shyǵýǵa sóz bergen kıller de anyqtalyp tur. Biraq oqıǵanyń barysyn, qalaı bastalǵanyn, ondaǵy ár sáttiń sebep-saldaryna úńilý kerek. Zertteı kele anyqtalǵany, álgi áıeldiń kúıeýi turaqty tabysy bar kásipkerdiń biri eken. Kásibin aǵash ónimderin óńdeýden bastap, keıin nan pisirý sehy men tigin sehynyń qurylǵysyn, «Leksýs-RX-300» pen aýyr júk kóteretin kólik satyp alyp, isin keńeıte túsipti. 2016 jyly qalalyq sot sheshimimen ekeýiniń nekesi buzylyp, 4 balasy men áıeline osy dúnıelerdi, úıdi qaldyryp kete bergen.
Biraq, osynsha múlikti mise tutpaǵan áıeldiń burynǵy kúıeýin óltirtse onyń basqa da jıǵany balalaryna mura bop qalatyny, óziniń de osy arqyly baılyqqa jaqyndaı túsetini kúndiz oıynan, túnde túsinen ketpeı qoıady. Osy oımen buryn jazasyn Qyzylordadaǵy qonys-kolonııada ótegen, sol tusta kúıeýiniń seriktestiginde jumys istegen Túrkistan oblysynyń turǵynyna habarlasady.
Ekeýiniń alǵashqy kezdesýi oblys ortalyǵyndaǵy avtovokzalda bolypty. Áıel sol jerde tanysyna páter jaldaýy úshin 20 myń teńge usynyp, burynǵy kúıeýin óltirtý týraly usynysyn aıtady. Al buryn sottalǵan azamat bul qylmystyq pıǵyldy áshkereleýdi durys kórip, oblystyq Polısııa departamentine aryzdanady.
– Dereý sotqa deıingi tergep-tekserý bastaldy. Qyzylorda qalasynyń mamandandyrylǵan tergeý soty kúdiktiniń qylmystyq áreketin áshkereleý úshin adamdy jáne jasyryn aýdıo jáne beınebaqylaý quraldaryn paıdalanýǵa sanksııa berdi. Áıelden tapsyrys alǵan azamatty arnaıy kisi óltirýshi retinde belgiledik. Aldyn ala jasalǵan jospar boıynsha «kıller» jábirlenýshini «óltirgeni» týraly oqıǵany dáleldeý úshin ımıtasııa jasaýy kerek edi. «Kıllerge» jábirlenýshiniń ústine qan jaǵyp, pyshaq pen oǵan tıesili basqa da zattaryn uıaly telefonǵa túsirip, áıeldi sendire túsý tapsyryldy, – deıdi Narıman Ábilákim.
«Kisi óltirýshi» tapsyrysty oryndaıtyn kúni áıelmen A.Toqmaǵambetov kóshesi boıyndaǵy bir úıdiń aýlasynda kezdesip, burynǵy kúıeýiniń kózi joıylǵanyn kórýge asyqqan kelinshektiń kóligimen oqıǵa ótetin jerge jetedi. Kóp keshikpeı «kıller» oıǵa alǵan isteri júzege asqansha qala ortalyǵynda kúte turýǵa kelisken áıelge habarlasyp, kúıeýin óltirgenin, darııa boıymen qashyp kele jatqanyn aıtady. Ekeýi kezdesken sátte uıaly telefonyndaǵy jigittiń qansyrap jatqan fotosýretin, qan juqqan pyshaqty kórsetedi. Osylaısha muqııat oılastyrylǵan operasııa nátıjesinde áıel qylmystyq pıǵyly tolyǵymen «oryndalǵanyna» kózin jetkizedi. Sodan keıin «kıllerge» jolkire retinde 10 myń teńge usynady. Al burynǵy kúıeýiniń atyna tirkelgen múlikter balalaryna mura bolyp ótkennen keıin ǵana kelisilgen 20 myń AQSh dollaryn beretinin aıtady.
Basty sot talqylaýynda burynǵy kúıeýi sottalýshyǵa barynsha jeńil jaza berýin surapty. Qyzylorda oblysy mamandandyrylǵan aýdanaralyq sotynyń úkimimen sottalýshy 7 jyl 6 aıǵa bas bostandyǵynan aıyryldy.
QYZYLORDA
