Mańǵystaý oblysy Aqtaý qalasyndaǵy dárigerlerge «salǵyrttyqtary kisi ólimine ákelip soqty» degen aıyp taǵylyp,isteri sot otyrysynda qaralǵan bolatyn. 3 dáriger raqymshylyqqa ilinip, sot zalynan bosap shyqty. Bul týraly «Astana» telearnasy habarlady.
О́tken aptadaǵy aqparymyzda Mańǵystaý oblystyq aýrýhanasynyń dárigerlerine baılanysty sot otyrysy bastalǵanyn jazǵanbyz. Osyǵan qatysty qylmystyq is birneshe ret toqtatylsa da, marqumnyń anasy osy joly ádil sheshimniń bolatynyna úmitin úzbegen edi..Alaıda, is júzinde olaı bolmaı shyqty. «Aıypkerlerge qatysty raqymshylyq qoldanýǵa quqymyz bar. Buǵan prokýror da qarsylyq bildirgen joq. Degenmen, sot prosesiniń aıaqtalýy dárigerlerdi jaýapkershilikten qutqarmaıdy. Olar áli de aıypker retinde qarastyrylady.»,-deıdi Aqtaý qalalyq sotynyń sýdıasy Maret Kovraeva.
Bul sheshim dárigerlerdiń emdeý mekemesinde jumys isteýine kedergi keltirmeıtin kórinedi. Jábirlenýshi tarap taǵy shaǵym jazýǵa ázirlenip jatyr. О́ıtkeni, dárigerler kináli ekendikterin sotta moıyndady.
Osydan 3 jyl buryn Danııar Imashev jol apatyna túsip, túrli dene jaraqatymen aýrýhanaǵa túsken bolatyn. Sol kezde oǵan ota jasaǵan dárigerler onyń bir aptadan keıin saýyǵyp ketetinin aıtqan. Ol 7 saǵattan keıin kóz jumǵanynda, dárigerler munyń sebebin júregi kenetten toqtap qalýymen baılanystyrdy. Al saraptama qorytyndysynda ókpege qan ketýinen jaǵdaıy nasharlaǵany kórsetilgen.
Baqytbek Keneshuly.
Derekkóz: «Astana» telearnasy.
.
