«Mııaly aýylynda ornalasqan H.Dosmuhameduly atyndaǵy orta mektepte 21 oqýshy ınklıýzıvti bilim alady. Onyń altaýy úıinde dáris alyp otyr. Beseýi psıhıkalyq damýynda tejelýi bar balalarǵa arnalǵan (PDT) synypta, qalǵany qatarlastarymen birge oqıdy», deıdi mektep dırektory Gúlshara Sary.
Onyń málimetinshe, mektepte fızıka, ınformatıka, hımııa, bıologııa pánderi úsh tilde oqytylady. Al, 8-11-synyptarǵa atalǵan pánder úıirme, fakýltatıv sabaqtyń esebinen engizilipti.
«Múmkindigi shekteýli oqýshylarǵa arnaıy jeńildetilgen baǵdarlama qarastyryldy. Mekteptiń psıhologtary osyndaı oqýshylardy korreksııalyq jumystar arqyly tárbıeleıdi. Oqýshylar oılaý qabiletin damytatyn motorıkalyq oıyndarǵa qatysyp, jattyǵýlar jasaıdy», deıdi mekteptiń pedagog-psıhology Barshagúl Sarsenǵalıeva.
