Aımaqtar • 13 Qańtar, 2021

Qyzylordada qarjy pıramıdasyn qurǵan alaıaq sottaldy

350 ret

kórsetildi

1 mın

oqý úshin

Qarjy pıramıdasyn quryp, ózine sengen jurtqa jer sıpatyp ketip júrgen alaıaqtardyń qylmysyn áshkereleý kóbine qıynǵa túsip jatady. Qyzylorda qalalyq Polısııa basqarmasynyń tergeýshisi Nurbol Nurmaǵanbet osyndaı alpys aılaly alaıaqtyń biriniń kinásin dáleldep sotqa joldaǵan edi. Is boıynsha 1982 jyly týǵan, buryn sotty bolǵan áıeldiń qarjy pıramıdasyn qurý arqyly 152 azamattyń 91 mıllıon 496 myń teńgeden astam qarjysyn qoldy etkeni anyqtalǵan, dep habarlaıdy Egemen.kz.

Murat JETPISBAEV

Qyzylordada qarjy pıramıdasyn qurǵan alaıaq sottaldy

Oqıǵa 2019 jyldyń tamyz aıynan bastaý alypty. Alaıaq «WhatsApp» jelisinde «Aı-shýaq» tobyn ashyp, qarjylyq pıramıda quryp, oǵan basshylyq jasaǵan. Topqa qosylǵan birinshi qatysýshylar alǵashqy salymdaryn salyp, 40 paıyz ústemesimen óz qarajattaryn qaıtaryp alyp otyrǵany belgili boldy. Jalpy aınalymdaǵy qarjy 1 mlrd 695 mln 538 myń teńgeni quraǵan. Alaıaq keıinnen qosylǵan pıramıda qatysýshylaryna qur ýádeni úıip-tógip, kózden tasa bolǵan.

Osy atalǵan derek boıynsha Qazaqstan Respýblıkasynyń Qylmystyq kodeksiniń 217-babynyń 3-bóliginiń 2-tarmaǵymen sotqa deıingi tergep-tekserý amaldary júrgizildi. Qyzylorda qalalyq sotynyń sheshimimen aıyptalýshy 5 jylǵa bas bostandyǵynan aıyryldy.