Atalǵan baǵdarlama 2027 jylǵa deıin eseptelip, oblystyń barlyq tirek jáne seriktes aýyldaryn qamtıtyn bolady. О́ńirdegi Osakarov, Abaı, Aqtoǵaı, Buqar jyraý, Qarqaraly, Nura jáne Shet aýdandaryndaǵy 11 eldi mekende áleýmettik, qurylys jáne turǵyn úı-kommýnaldyq salalar boıynsha 19 jobany júzege asyrý josparlanǵan.
Naqtyraq aıtar bolsaq, Egindibulaq kenti turǵyndarynyń oblys ákimine birneshe márte joldaǵan ótinishi qanaǵattandyrylyp, buryn aýdan ortalyǵy bolǵan bul eldi mekende dene shynyqtyrý-saýyqtyrý kesheni boı kótermekshi. Sondaı-aq Nura aýdanyndaǵy Kertindi aýylynda feldsherlik-akýsherlik pýnkt salý da josparda bar.
Shet aýdanyndaǵy Aqadyr kentinde 3,8 shaqyrym bolatyn káriz jelileriniń qurylysyna jáne olarǵa qyzmet kórsetýge, sondaı-aq bes shaqyrymdyq sý qubyrynyń rezervtik jelisiniń tartylýyna qomaqty qarjy bólinedi. Sonymen qatar Osakarov aýdanyndaǵy Molodejnyı kenti men Aqbulaq aýylynda jeti joba boıynsha, atap aıtqanda, birneshe mektep pen aýyl joldaryn jóndeý jumystary iske asyrylmaqshy. Jol demekshi, jalpy «Aýyl – El besigi» baǵdarlamasy aıasynda oblystyń úsh aýdanynda 35 shaqyrym bolatyn aýylishilik joldar jóndeýden ótedi.
Qaraǵandy oblysynyń ákimi Jeńis Qasymbek bul baǵdarlama aıasyndaǵy jumystar óńirdegi barlyq aýdandardy qamtýy tıis dep sanaıdy.
– Bul jobanyń arqasynda eldi mekenderdiń ınfraqurylymy jaqsaryp, tirek jáne seriktes aýyldarda turatyn turǵyndardyń kásipkerlik belsendiligi artyp, turaqty jumys oryndaryn qurýdy qamtamasyz etetinin kórip otyrmyz, – deıdi óńir basshysy.
Eske salar bolsaq, ótken jyly «Aýyl – El besigi» memlekettik baǵdarlamasyn qarjylandyrý tórt eseden astam ulǵaıyp, sonyń nátıjesinde 47 joba boıynsha aýqymdy jumys júrgizildi. Atap aıtqanda, jalpy bilim beretin toǵyz mektep pen bir sport mektebi jóndeýden ótti. Eki aýdandyq aýrýhana men dárigerlik ambýlatorııa ǵımaratyna jóndeý jumystary júrgizildi. Budan bólek, aýyldyq jerlerdegi 25 shaqyrym sý qubyry jelileri qaıta jańartylyp, 70 shaqyrym bolatyn kentishilik joldarǵa jóndeldi.
