Almasbektiń «aqyldy bólmesinen» onyń ózi oılap tapqan antenna túrindegi qabyldaǵysh pen symsyz ınternet taratqysh qurylǵylar arqyly búkil aýylǵa Wi-Fi jelisi taralady. Bólme arqyly qaýipsiz ınternet júıesine baqylaý qoıylyp, qajetsiz saıttar men paıdasyz aqparatty suryptaý, qadaǵalaý júıesi de ornatylǵan.
– SMART bólmeni oılap tabýdaǵy eń basty maqsatym – aýyl men qala balalarynyń bilim sapasy arasyndaǵy alshaqtyqty joıý. Oblys ortalyqtaryndaǵy zamanaýı tehnologııalardan óz oqýshylarym da habardar bolsa degen oıda boldym, – deıdi aýyl muǵalimi.
SMART bólmeniń taǵy bir jańalyǵy – qashyqtan basqarý júıesi. Ata-analar mekteptegi sabaqty provaıderler arqyly baqylaı alady.
«Aqyldy bólme» avtory Almasbek Qaldybek jańa júıede qaýipsizdik te barynsha eskerilgenin aıtyp otyr. Mysaly, osynda sabaq ótken ustazdar kabınet jaryǵyn nemese kompıýterlerdi sóndirýdi umyt qaldyrsa, avtomatty túrde qashyqtan óshirýge nemese qosýǵa múmkindik bar. Munda kirgenderge qaýipsizdik erejelerin qatań saqtaý kerektigi daýystyq habarlama arqyly eskertilip otyrady. «Aqyldy bólmeni» qımyl-qozǵalys pen daýys, uıaly telefon arqyly basqarý júıesi de oılastyrylypty.
Almasbek Qaldybektiń shákirtteri de tehnologııalyq jańalyq avtorlary atanyp júr. Osyndaǵy úıirmelerge qatysatyn oqýshylar teledıdar pýlti arqyly ınteraktıvti taqtany qashyqtan basqarý qurylǵysyn jasap shyǵarǵan. Munan bólek, kún sáýlesiniń túsýine qaraı qozǵalatyn perdeler oılap tapty. Kún qatty túsken ýaqytta «aqyldy perdeler» tómendep, terezeni barynsha kóleńkeleıdi. Bultty kúnderi túrilip, bólmege jaryqtyń mol túsýine múmkindik jasaıdy.
Qyzylorda oblysy
