Feldsherdiń aıtýynsha, Atyraý qalasyna taıaý ornalasqan Erkinqala aýylynan shaqyrtý túsipti. Arnaıy brıgadasy mekenjaıǵa 10 mınýtta jetip, júkti anany oblystyq perınataldyq ortalyqqa jetkizýge bet alady. Alaıda, jedel járdem kóliginde 20 jastaǵy júkti ananyń tolǵaǵy qysyp, bosanýdyń belgisi baıqala bastapty.
Sol sátte feldsher Maǵjan Súıinǵalıev 3 kılo 200 gramm salmaǵy bar torsyqtaı uldyń ómirge kelýine qolushyn sozdy. Brıgadadaǵy áriptesteri jas bolsa da ózine júktelgen jaýapkershilikti jete sezingen feldsherdiń kásibıligine tánti boldy. Ol anasyn da, jedel járdem brıgadasynyń múshelerin de qýantyp, ińgálap jatqan náresteniń kindigin kesip, perınataldyq ortalyqqa aman-esen jetkizdi. Al mundaǵy akýsherler sábıdiń de, anasynyń jaǵdaıyn qanaǵattanarlyq dep baǵalap otyr.
– Bul – meniń mindetim. Bizdiń kólikte naýqas bola ma, álde júkti ana bola ma, bárine kómegimdi kórsetýim kerek. Buǵan deıin jedel járdem kóliginde úsh ananyń bosanýyna qol ushymdy sozǵandyqtan, bul joly da kásibı turǵydan áreket ettim, – deıdi feldsher Maǵjan Súıinǵalıev.
Atyraý oblysy
