Sýretterdi túsirgen Erlan OMAR, «EQ»
Atap aıtqanda, «Qarabaq – Ázerbaıjannyń jaýhary: tarıhy, mádenıeti, tabıǵaty», «Joǵaltqan baqytym: Qarabaqtyń shynaıy oqıǵalary» jáne «Ázerbaıjan Halyq Respýblıkasy» kitaptary oqyrmanǵa jol tartty.
Aıta keterligi, úsh jınaq ta qazaq tilinde jaryq kórdi. Al Qarabaq týraly albom-kitap – halyqaralyq uıym tarapynan shyǵarylǵan alǵashqy kitap.
Tusaýkeser rásiminiń qurmetti qonaqtary qatarynda Ázerbaıjannyń Qazaqstandaǵy Tótenshe jáne ókiletti elshisi Rashad Mammadov, Qyrǵyz Respýblıkasynyń Qazaqstandaǵy Tótenshe jáne ókiletti elshisi Jeenbek Kýlýbaev boldy. Sonymen qatar Ázerbaıjan Mıllı Medjlısiniń depýtaty, Mádenıet komıtetiniń tóraıymy Ganıra Pashaeva, Qyrǵyzstannyń eks-memlekettik hatshysy Osmanakýn Ibraımov, Eýrazııa jazýshylar odaǵynyń tóraǵasy Iаkýp О́meroǵly da qatysty. Sondaı-aq Ázerbaıjan parlamenti depýtattary jıynǵa arnaıy kelgenin aıta ketken jón. Budan bólek, Túrki elderiniń jazýshylary, memleket jáne qoǵam qaıratkerleri, dıplomatııalyq korpýs ókilderi, tanymal ǵalymdar men zııaly qaýym is-sharanyń basy-qasynda júrdi.
«Halyqaralyq Túrki akademııasy Qarabaq máselesinde árdaıym Ázerbaıjannyń janynda boldy, qoldady. Bizdiń eń úlken tartýymyz – Qarabaq týraly albom-kitap, Ázerbaıjan Respýblıkasynyń júz jyldyǵyna arnalǵan kitap jáne Qarabaqtyń shynaıy oqıǵalary týraly áńgimeler jınaǵy jaryq kórdi. Oǵan ótken jyldyń basynan beri daıyndyq júrgizdik. Sapaly sýretter men materıaldardy jınastyrdyq. Bizdiń bul kitapty baspaǵa berýimiz Ázerbaıjannyń Shýshany alýymen sáıkes keldi», dedi Halyqaralyq Túrki akademııasynyń prezıdenti Darhan Qydyráli.
Sondaı-aq jıyn barysynda Ázerbaıjannyń Qazaqstandaǵy Tótenshe jáne ókiletti elshisi Rashad Mammadov Halyqaralyq Túrki akademııasynyń arnaıy medalimen marapattaldy.
Budan keıin sóz alǵan Rashad Mammadov Elbasy bastamasymen qurylǵan Túrki akademııasynyń baýyrlas elderge ortaq ıgilik sanalatynyn atap ótti. Sondaı-aq Halyqaralyq Túrki akademııasy atqaryp jatqan jumystarǵa toqtalyp, Túrki memleketterin jaqyndastyrýǵa zor úles qosyp otyrǵanyn jetkizdi. Elshi óz sózinde Qazaqstan halqyna qıyn kezeńde qoldaý kórsetkeni úshin rahmet aıtty.
«Túrki akademııasy ekinshi Qarabaq soǵysy bastalǵannan-aq Ázerbaıjan halqynyń janynan tabyldy. Súıeý boldy, qoldaý kórsetti. Árdaıym ádilet sózin sóılep, jarqyn jeńisimizdi jaqyndatýǵa úles qosty. Qarabaq týraly qazaq tilinde alǵash ret kitaptyń jaryq kórýi óte mańyzdy. О́ıtkeni bul jınaq táýelsiz uıym tarapynan jaryq kórip, álemge Qarabaqtaǵy oqıǵalardy shynaıy jetkizedi.
Akademııa jyldar boıy tarıhı, geografııalyq, ádebı jáne odan da basqa kitaptardy shyǵaryp, Ázerbaıjandy baýyrlas halyqtarǵa, baýyrlas halyqtardy Ázerbaıjanǵa tanyta aldy. Ortaq tarıhymyz ben ortaq geografııamyz jazyldy. Osylaısha, búkil Túrki álemi ǵalymdarynyń basyn qosqan úlken alańǵa aınaldy», dedi Ázerbaıjan elshisi.
Qyrǵyzstannyń eks-memlekettik hatshysy Osmanakýn Ibraımov óz sózinde Qarabaq týraly kitaptyń qazaq tilinde jaryq kórýin joǵary baǵalady.
«Halyqaralyq Túrki akademııasy qoǵamǵa qajetti, elderimizdi jaqyndastyratyn mańyzdy sharalar uıymdastyryp, qundy kitaptar jarııalap keledi. Taıaýda jaryq kórgen «Túrki áleminiń tarıhı-mádenı atlasy» sonyń aıǵaǵy», dedi O.Ibraımov.
Budan keıin Ázerbaıjan Mıllı Medjlısiniń depýtaty, Mádenıet komıtetiniń tóraıymy Ganıra Pashaeva sóz alyp, Qazaqstanǵa jáne Halyqaralyq túrki akademııasyna qoldaý bildirgeni úshin alǵysyn jetkizdi.
«Kelisim nátıjesinde, Ázerbaıjannyń negizgi terrıtorııasy men Nahchıvan avtonomııalyq respýblıkasy arasynda dáliz ashyldy. Bul – túrki elderi úshin úlken jetistik. Iаǵnı tikeleı baılanys ornatýǵa múmkindik týady», dedi G.Pashaeva.
Jıynǵa qatysýshylar túrki elderiniń yntymaqtastyǵyn damytýǵa osyndaı jınaqtardyń jaryq kórýi zor úles qosatynyn atap ótti.
