Búgin, 12 jeltoqsan kúni elimizde 1 myń teńge nomınalynda jańa banknot shyǵaryldy. Ol «Kúltegin» túrki jazba eskertkishine arnalǵan. Bul týraly Kapital.kz iskerlik portaly habarlady.
Jańa banknot túsi – qońyr-sary, 134x70 mm kólemdi qaǵazǵa basylǵan. Onyń oń tusynda «Qazaq eli» monýmenti jáne sol jaǵynda tómende ushyp bara jatqan kepterler beınelengen. Al ortasynyń sol jaq buryshynda Kúltegin eskertkishiniń bir bóligi tur. Joǵarǵy jaǵynan Qazaqstan Respýblıkasynyń memlekettik rámizderi – gerb pen jalaý oryn alǵan. Sol jaǵynyń joǵary tusyna nomınal sıfrlyq tańba men onyń astyna memlekettik tildegi eskertpe jazý berilgen. Onda: «Banknottardy qoldan jasaý zańmen qýdalanady», dep jazylǵan. Sol jaq tik kólbeýinen nomınaldyń memlekettik tilde árip tańbasymen jazylǵan qunyn jáne «QAZAQSTAN ULTTYQ BANKI» degen anyqtamasyn oqı alasyzdar.
Banknottyń kelesi betinde beınelerdiń basym bóligi kólbeý syzyqtarmen bederlengen. Ol tustan túrki jaýyngerleriniń tasqa salynǵan beınelerin, artqy planda túrki jazbasynyń eskertkishin kóre alasyzdar. Sol jaq tómende jáne oń jaq joǵaryda banknot nomınalynyń sıfrlyq tańbalary oryn alǵan. Sol jaqta eni 12 mm golografııalyq beldeýler, onda memlekettik jalaýdyń fragmentteri, Ulttyq bank logotıpi men «Eskertkish teńge» degen jazý tur. Orta tustyń joǵarysyna «QAZAQSTAN ULTTYQ BANKI» dep jazylǵan. Sonymen birge, orys tilindegi «Poddelka banknot presledýetsıa po zakoný» degen eskertpe men tómende nomınaldyń sıfrlyq tańbasy oryn alǵan.
Eskertkish banknottyń taralymy-10 mln. dana.
Derekkóz: Kapital.kz
