JALPYMEMLEKETTIK MÚDDE ESKERILÝI TIIS

Bıylǵy jyldyń sáýir aıynyń 23-i kúni Qostanaı oblysynan shyǵyp qalǵan depýtattyń ornyna Parlament Senatynyń depýtatyn saılaý ótetin bolady. Bul saıası úderistiń ereksheligi men barysy jóninde Qazaqstan Respýblıkasy Ortalyq saılaý komıssııasynyń Hatshysy Baqyt MELDEShOVKE jolyǵyp, bilgen edik. – Baqyt Sársenbaıuly, 23 sáýir­de ótetin saılaýǵa barlyǵy qan­sha kandıdat usynyldy? Olar­dyń ishinde qanshasy úmitker retinde tirkeldi? – Saılaý zańnamasyna sáıkes, Se­nat depýtattyǵyna kandıdattar­dy máslıhattar usynady. Buǵan qosa, azamattardyń ózin-ózi usy­ný­ǵa quqy bar. Al olar kandıdat re­tinde tirkelý úshin barlyq más­lı­hattar depýtattarynyń jalpy sanynyń keminde 10 paıyzynyń qoldaýyna ıe bolýy tıis. Ortalyq saılaý komıssııasy bekitken Saılaýdy ázirleý men ótkizý jónindegi negizgi is-shara­lardyń kúntizbelik josparyna sáıkes, Qostanaı oblysynan Senat depýtattyǵyna kandıdattar usyný bıylǵy jyldyń 12 aqpany men 22 naýryzy aralyǵynda júrdi. Al tirkeý sáýirdiń 2-si kúni aıaqtaldy. Saılaýǵa eki kandıdat tirkeldi. Máselen, Asqar Muratov degen azamat ózin-ózi usyný tártibimen, al Jeńis Nurǵalıev degen kandıdatty Qostanaı oblystyq máslıhaty usyndy. Qostanaı oblystyq saılaý komıssııasy bul eki kandıdatty da sáýirdiń 1-i kúni tirkedi. – Saılaýǵa daıyndyq barysy týraly ne aıtar edińiz? – Búginde Senat depýtattyǵyna kandıdattardyń ekeýi de saı­laý­al­dy úgit-nasıhat jumystaryn júr­gi­zip jatyr. Bul úgit-nasıhat ju­mystary kúntizbelik josparǵa sáı­kes, sáýirdiń 21-i kúni saǵat 24.00-ge deıin júretin bolady. Kandı­dat­tardyń úgit júrgizýine teń jaǵdaı jasalǵan. Memleket te úgit-nasıhat jumystary úshin teń kólemde qar­jy bólip otyr. Buǵan qosa, óńirlik buqaralyq aqparat quraldaryna shyǵýǵa da qarjy qarastyryldy. Bul durys. Sebebi, depýtatty sol óńirdegi azamattar saılaıdy ǵoı. Taǵy bir atap óterligi, saılaýǵa tús­ken kandıdat respýblıkalyq buqa­ra­lyq aqparat quraldaryna shyǵýǵa da tolyqtaı quqyly. Alaıda, mun­daı jaǵdaıda BAQ-tyń qyzmeti úshin tólemderdi úmitkerler ózderi­niń saılaý qorlary esebinen júrgizedi. – Al saılaýdy oıdaǵydaı ót­kizýge jalpy qansha kólemde qarjy bólindi? – Saılaýdy ótkizýge respýb­lı­kalyq bıýdjetten 2 714 500 teńge bólingen. – Túsinikti. Bul sharalardyń barlyǵy saılaýaldy naýqandy keń aýqymda uıymdastyrýǵa múmkindik beredi deısiz ǵoı. – Árıne. Senat depýtattyǵyna saılaý naýqanyn júrgizýge barlyq múmkindik qarastyrylǵan. Má­selen, Qostanaı oblystyq saılaý komıssııasy, jergilikti memlekettik basqarý organdary kandıdattarǵa saılaýshylarmen, jergilikti halyq­pen kezdesýler ótkizý úshin úı-jaı­lardy shart negizinde jáne teń jaǵ­daıda usynyp otyr. Sol sebepti, kandıdattar óz kezeginde bul múm­kindikterdi ózderiniń saılaýaldy baǵdarlamalarynyń negizgi mazmu­nyn tek tańdaýshylarǵa ǵana emes, tutas halyqqa jetkizý úshin paıda­la­nady ǵoı dep úmittenemin. Bul rette kandıdattyń reıtıngi, ıaǵnı onyń saılaný múmkindigi sol aza­mattyń óńirdegi bedeline de baılanysty bolady der edim. – Saılaýdyń qorytyndylary qashan jarııalanbaq? – Ortalyq saılaý komıssııasy saılaýdyń túpkilikti qorytyndy­la­ryn bıylǵy jyldyń 29 sáýirinen keshiktirmeı shyǵarady. Al mamyr­dyń 2-sinen keshiktirmeı BAQ-ta jarııalaıtyn bolamyz. Bul jerde meniń aıtarym, ol – máslıhattar depýtattaryna úlken jaýapkershiliktiń júkteletini. Sebebi, eki úmitkerdiń bireýine daýys berý kezinde aldymen jalpyme­m­le­ket­tik múddeni basshylyqqa alý kerek. Áńgimelesken Láıla EDILQYZY.