2013 jyldan bastap jumys isteıtin uıymnyń jetekshisin jasóspirimderge qoldaý kórsetý máselesi qatty mazalaıtyn. Osy baǵytta biraz jobalar júzege asyryp úlgergen uıym, biraz tájirıbe jınaqtaǵan.
«Men jýrnalıstıka salasynda jumys istedim. Sonyń arqasynda kúndelikti túrli taǵdyrlar men jaǵdaılardy keziktirdim. Sondaǵy túıgen oılarymnyń biri – az qamtylǵan, kópbalaly otbasylardyń balalarynyń jáne jetim balalardyń qabilettilikteri men bilimge qushtarlyqtary úlken. О́kinishke qaraı, olardy odan ári damytýǵa kópshiliginiń múmkindikteri joq. О́ıtkeni, úıirmelerge qatysyp, qosymsha sabaqtar alý úshin qarajat kerek ekeni belgili», - dep bólisti qor basshysy Aǵıba Qateshova.
Aǵıba áleýmettik osal toptardan shyqqan jáne jetim balalarǵa arnalǵan tegin bilim beretin mektep nemese ortalyq ashýdy armandaıtyn. Arman ony adastyrmady. Osylaısha 2019 jyldyń jazynda «Samruk-Kazyna Trust» Áleýmettik jobalardy damytý qory uıymdastyrǵan «Áreket» granttar baıqaýyna tap boldy. Baıqaýdyń bastapqy deńgeılerinen sátti ótip, fınalıster tizimine ilikti.
Baıqaýǵa usynylǵan «Zerger sóz» jobasynyń maqsaty - balalarǵa qosymsha bilim beretin ortalyq ashyp, onda atalǵan sanattaǵy balalardy tegin oqytý. Osy arqyly jasóspirimderdiń qyzyǵýshylyqtaryn qoldap, bolashaqqa degen senimderin arttyrý bolatyn. Joba óziniń ózektiligin dáleldep, 2 800 000 tg kólemindegi grantqa ıe boldy.
Baıqaý aıaqtalysymen qor qyzmetkerleri óz isterin bastap ketti, ortalyq jumys jasaıtyn oryn jalǵa alynyp, mamandar oqýdan ótti. Balalardyń sapaly bilim alýy úshin kerekti qural-jabdyqtar satyp alyndy. Atyraý qalasynda ashylǵan ortalyqta balalar kelesi baǵyttar boıynsha bilim aldy: sheshendik óner, qazaq tili, psıho-emosıonaldyq jaǵdaıdy jaqsartý boıynsha sabaqtar. Joba aıasynda oblystyń 107 jasóspirimi kómekpen qamtyldy.
«Balam oıyn tez jetkizemin dep asyǵyp sóıleıtin. Sondyqtan ol kóp sózderdi anyq aıta almaıtyn, tyńdaýshy ony durys túsinbeıtin. Ortalyqqa kelgennen keıin 1 aıdyń ishinde onyń sóıleý qabileti jetildi. Ustazdary Alıhanmen kóp jumys istedi. Qazir ol árbir sózin nyq aıtyp, ózin senimdi ustaıdy», - deıdi jobaǵa qatysqan Alıhannyń anasy.
Joba bastamashylarynyń aıtýy boıynsha qazaqtildi ortada ósken balalardyń kóbi jasqanshaq ári uıań minezdi bolyp keledi. Al «Zerger sóz» jobasynyń aldyna qoıǵan mindeti - osy balalardyń jan-jaǵynan seskenbeı, ashylyp, ózderine degen senimdilikterin arttyrýy. Joba aıasynda jumys jasaıtyn ortalyq qazaq tilinde bilim beredi, memlekettik tilge degen qyzyǵýshylyq orys mektepteriniń qatysýshylarynda da bar.
Sonymen qatar oblystyń balalar úıleriniń qatysýshylaryna da joba aıasynda qoldaý kórsetildi. Atap aıtqanda psıho-emosıonaldyq kúızelistiń aldyn alý baǵytyndaǵy jumystar óte nátıjeli boldy. Psıhologııalyq trenıngter, sheberlik sabaqtary, kezdesýler balalarǵa oń áserin berdi. Barlyq sabaqtardy kásibı pedagogtar men joǵary kategorııaly psıhologtar júrgizdi.
«Pandemııa ýaqytynda jumysymyz birshama shekteldi. Josparlarymyz ózgerdi. Degenmen ortalyqqa kelgen qatysýshylarmen sapaly jumys júrgizildi. Balalar jetken jetistikter – bizdiń jetistigimiz», - deıdi Aǵıba Qateshova.
Jasóspirimder Abaıdyń 175 jyldyǵyna arnalǵan chellendjde belsendi qatysty. Aımaqta uıymdastyrylǵan «Men baqytty balamyn» jas sýretshiler baıqaýynda da ózderiniń talanttaryn kórsetip, júldeli oryndardy ıemdendi. Kórkem sóz oqýdan ótken jarysta balalar ózderiniń ana tilderin tolyq meńgergen, jasqanbaıtyn, batyl ekendikterin kórsete bildi.
«Atamura» ujymynyń aıtýynsha «Samruk-Kazyna Trust» Qory júzege asyratyn «Áreket» jobasy olarǵa tek qarjylaı kómek kórsetken joq. Baıqaý aıasynda ótken oqýdan áleýmettik kásipkerge qajetti bilimdi ıgerýge múmkindik boldy. Endi qatysýshylardyń árqaısysynda eldiń ár aımaǵynda jumys jasaıtyn pikirles uıymdary bar. Olardy maqsaty bir – áleýmettik máselelerdi qoldan kelgenshe sheshý.
