Meniń oıymsha, «Egemenge» jazylý kerek dep, oǵan jarnama jasaýdyń qajeti joq. Elimizdiń bas basylymy mundaı jarnamaǵa zárý emes dep sanaımyn. «Egemen» onsyz da oqylady. О́ıtkeni, munda oqymasa bolmaıtyn, tipti oqytpasyńa qoımaıtyn materıaldar jetkilikti.
Meniń oıymsha, «Egemenge» jazylý kerek dep, oǵan jarnama jasaýdyń qajeti joq. Elimizdiń bas basylymy mundaı jarnamaǵa zárý emes dep sanaımyn. «Egemen» onsyz da oqylady. О́ıtkeni, munda oqymasa bolmaıtyn, tipti oqytpasyńa qoımaıtyn materıaldar jetkilikti.Taǵy bir basyn ashyp aıtatyn másele «Egemen» tek biryńǵaı egde tartqan adamdardyń oqıtyn gazeti desek, qateleser edik. Buǵan qosa, búgingi jastar da gazet betterinen ózderine qajetti tanymdyq jáne saraptamalyq taldaý turǵysyndaǵy san alýan materıaldarmen tanysa alady. Onyń ınternet-basylymyna úńilip, álemde bolyp jatqan birqatar oqıǵalardyń aldyn oraı otyryp, shuǵyl túrde berilgen saıttaǵy sarabdal sózine de kóz júgirte alady.
Memlekettik deńgeıde jáne respýblıka aımaqtarynda tolǵaǵy jetken máselelerdi túbirimen kóterip, qoparyp jazyp júrgen bir basylym osyndaı-aq bolar. «Syn túzelmeı, min túzelmeıdi» degendeı, bas basylymnyń osyndaı parasatty da paıymdy synynan soń jumysyn shıratqan, sylbyrlyq pen enjarlyqtan arylǵan jeke jáne zańdy tulǵalar qanshama? Sondaı-aq, munda oqyrmandar qyzyǵyp oqıtyn materıaldardyń biri – jahan jańalyqtary degen oıdamyn. Eger aldaǵy jyldary redaksııa alqasy bul taqyrypty odan ári tereńdete jazýǵa tıisti qadamdar jasasa, oqyrmandar aýdıtorııasy qazirgisinen de keńeıe túsedi demekpin.
Kún saıyn 12-14 bet kólemi úlken pishimmen shyǵatyn «Egemen Qazaqstan» gazetiniń jazylym baǵasy uzaq jyldar boıy ósirilmeı burynǵy kúıinde qaldy. Buǵan onyń turaqty oqyrmany retinde aıǵaq, kýá bola alamyn. Qazirgi baǵasy da áldeqaıda az betpen shyǵatyn keıbir respýblıkalyq jáne oblystyq basylymdar baǵasymen ólshegende birshama arzan. Meniń oıymsha, salmaqty basylymnyń baǵasy da salmaqty bolýy kerek. «Arzannyń tuzy tatymas» demeı me halqymyz.
Onyń ústine «Egemen» respýblıkanyń barlyq oblystarynda basylatyn bolǵandyqtan sol kúni tıetin, al shalǵaıdaǵy aýdandarǵa erteńine jetetin eldiń birden-bir basylymy ekenin umytpaıyq. Osy arqyly kún saıyn qanshama ózimizge qajetti aqparattar alamyz. Qanshama ózekti de kókeıkesti taqyryptarmen betpe-bet kelemiz. Taǵy da qaıtalap aıtamyn, mundaı baǵa jetpes rýhanı dúnıeni jazdyryp oqý – ózin qazaqpyn degen, ana tilin qurmettegen, ultynyń múddesin dittegen árbir azamattyń paryzy.
Birjan KÝHAEV,
«Aqjaıyq órenderi» jastar
qoǵamdyq birlestiginiń tóraǵasy.
Batys Qazaqstan oblysy,
Aqjaıyq aýdany.
