Atap aıtqanda, Aqmola, Qaraǵandy, Shyǵys Qazaqstan, Qostanaı, Pavlodar jáne Almaty oblystarynda kólik qozǵalysyna shekteý engizildi. Shekteý kezinde jol belgileri men qorshaýlar qoıyldy. Qolaısyz aýa raıy jaǵdaılaryna baılanysty jol qaýipsizdigin qamtamasyz etý, qıyn jaǵdaıǵa tap bolǵan adamdarǵa kómek kórsetý úshin patrýldik polısııa jasaqtary táýlik boıy kezekshilik etti. Osy kezeńde qar qursaýynan 50-ge jýyq avtokólik shyǵaryldy.
Osyǵan oraı mınıstrdiń atyna azamattardan alǵystar kelip túsýde, onda azamattar kórsetken kómekteri úshin polıseılerge jyly lebizderin bildirýde. Aıtalyq, Qyrǵyzstan Respýblıkasynyń Ekonomıka mınıstri Pavlodar oblysy Polısııa departamentiniń jeke quramyna alǵys joldaǵan. Bul hatta júk kóligin tizgindegen Qyrǵyzstan Respýblıkasynyń azamatyna qatty aıazda Shiderti kentiniń mańyndaǵy tas jolda turyp qalǵan kezde polıseılerdiń kómek kórsetkendigi aıtylǵan. Hatta polısııa podpolkovnıgi Jaqsylyq Baıysbekov, aǵa leıtenanttar Azamat Shaqshabaev pen Rýslan Vereshaktyń adamgershiligi men qyzmetinine degen adaldyǵy adam ómirin qutqarýǵa sebep boldy. Olar ózderine júktelgen mindetterdi abyroımen atqardy dep atap ótken.
Oqıǵany qysqasha baıandap ótsek, «Qazgıdromet» ortalyǵynyń –43 gradýsqa deıingi qatty aıazǵa baılanysty jasaǵan eskertýlerine qaramastan, júrgizýshi Reseı Federasııasynan Qyrǵyzstan Respýblıkasyna júk avtomobılimen jolǵa shyqqan. Biraq aýa raıynyń qolaısyzdyǵyna baılanysty mashınada janarmaı qatyp qalǵan. Osyndaı qıyn jaǵdaıda júrgizýshini qatty úsik shalýy múmkin edi. Alaıda jol boıynda turǵan júk kóligin sol jerde qyzmet atqaryp júrgen polıseıler baıqap, birden kómekke kelgen. Olar úlken júk kóligin jyly boksqa aparyp, júrgizýshige jylynýǵa kómektesken. Kólik aqaýy jóndelgen soń júrgizýshi qaıta jolǵa attanǵan.
IIM qys mezgilinde aýa raıynyń qozǵalys rejımderine áser etetinin, jaýyn-shashyn kezinde aınalany kórý nasharlaıtynyn eskerý kerektigin eske salady. Júrgizýshiler aýa raıy jaǵdaılaryn eskerip, qaýipsiz jyldamdyqty jáne avtomobılder arasyndaǵy qashyqtyqty saqtaýy qajet.
