Myńdaǵan almatylyq baspana jyryna núkte qoıady

Sońǵy jyldary júıeli júze­ge asyp jatqan ońtaıly baǵ­dar­lamalar jumysshy jastar úshin úmit shamyn jaqqany ras. Tirnektep tapqanyńdy jaldamaly páter ıesiniń qaltasyna quı­ǵannan kóri paıyzdyq mól­sher­lemesi tómen, biraz jyldan keıin ıeligińde qalatyn óz úıińde ómir súrgen kóńilge de jubanysh. Almaty qalasynda áleýmettik salada jumys isteıtin kez kelgen jas úshin mundaı múmkindiktiń qaqpasyn ashyp bergen «Almaty jastary 3:0» baǵdarlamasy iske qosylǵan bir jyl ishinde myńǵa tarta otbasy qonys toıyn toılady. B.Saǵyntaev baǵdarlama arnasyn odan ary keńitip, 2021 jyly taǵy da myńdaǵan otbasy baspana alý baqytyna keneletinin alǵa tartty. Ákimniń sózinshe, osy baǵytta ákimdik pen «Otbasy bank» AQ arasynda talqylaý júrip jatyr.

«Byltyr bankpen birige otyryp 13 mlrd teńge bóldik. Búginde qala ekonomıkasynyń ár salasynda eńbek etip jatqan 1 myńǵa jýyq jas osy baǵdarlamamen páter aldy. Bıyl da osyny jalǵas­ty­ra­myz. Inflıasııaǵa baılanysty naryqta páter qymbattap barady. Soǵan oraı nesıe kólemin 18 mlrd teńgege jetkizip otyrmyz. Bıyl da 1 myń páter beriledi. Bul «Nurly jer», «Baqytty otbasy» baǵdarlamalarynan tys júzege aspaq», dedi qala basshysy.

Eske salsaq, «Almaty jastary 3:0» baǵdarlamasy 35 jasqa deıingi áleýmettik sala qyzmetkerlerin qoldaýǵa baǵyttalǵan. Olardyń sapynda – muǵalimder, dárigerler, JOO oqytýshylary, mádenıet, sport salasynyń ókilderi, jýrnalıster men ǵalymdar bar.

Tutas el kólemindegi stýdent­ter­diń teń jartysyn qamtıtyn shaharda jataqhana jaıy da túıit­kil­di máseleniń biri. Ákim buǵan deıin 25 joǵary oqý orny­nyń aýmaǵynda 16 myń orynǵa arnalǵan 38 jataqhana, sonymen birge eki kolledjde 600 adamǵa shaqtalǵan stýdentter úıi salynatynyn tilge tıek etken. Atalǵan jospar oıdaǵydaı júzege asar bolsa, on myńdaǵan shákirt baspana jaldap bas qatyrmas edi.

Bıyl bolashaǵy úshin qor jı­nasam deıtin jastar úshin de aqjoltaı jańalyqtyń sheti shyq­ty. Buǵan deıin qalada keń óris alǵan jalǵa alý baǵdarlamasymen 5 myńǵa tarta jumysker jas bas­panaly bolýy bek múmkin. 8,4 myń kóp páterli turǵyn úıi bar Almaty eldegi tur­ǵyn úı qory eń baı qala ekenin atap ótken jón. Dese de kún sanap aýmaǵy ulǵaıǵan megapolıste bas­pana kezegi qarqyndap ósip keledi. Búgingi tańda 20 myńnan astam adam turǵyn úı kezeginde tur.

ALMATY