Bas sanıtarlyq dárigerlerdiń qaýlysyna sáıkes elimiz boıynsha 15 sanıtarlyq (Almaty oblysy – 9, Qostanaı oblysy – 4 jáne Aqtóbe oblysy – 2) jáne 4 blok-beket (Atyraý oblysy – 4) qoıylǵan. Karantındik is-sharalarǵa 10 myńnan astam polısııa men Ulttyq ulannyń áskerı qyzmetshileri jumyldyrylǵan. 290 karantındik obekti baqylaýǵa alynǵan.
Sondaı-aq kólik obektilerinde sanıtarlyq dárigerlerge jolaýshylardy fıltrasııadan ótkizýge járdemdesý qamtamasyz etiledi. Osy maqsatta elimizdiń halyqaralyq áýejaılarynda 18 baqylaý-qadaǵalaý pýnkti, temirjol vokzaldarynda 16 baqylaý-qadaǵalaý pýnkti ornatyldy. Bul obektilerdegi kún saıynǵy jolaýshylar aǵyny tıisinshe 31 myń jáne 17 myń adamdy quraıdy: Nur-Sultan qalasynda táýlik saıyn 10 myńǵa deıin jolaýshy, Almatyda táýlik saıyn 20,5 myńǵa deıin adam tirkeledi.
«Kólik obektilerinen 1 qańtardan beri PTR-anyqtamasy joq 3200 azamat karantınge ornalastyryldy. Sońǵy kúnderi táýlik saıyn 150 adamǵa deıin karantınge ornalastyrylýda», – dedi IIM basshysy.
Karantındik shekteýlerdiń saqtalýyn baqylaý boıynsha 1 myńnan astam mobıldi toptyń qatysý jumysy jalǵasýda. Jyl basynan beri 9 myńnan astam reıdtik is-shara ótkizildi. Karantındi buzýdyń 773 faktisi anyqtaldy, onyń 77%-y eleýsiz, ıaǵnı maska, sanıtaızerlerdiń bolmaýy, áleýmettik ara qashyqtyqty saqtaýdy buzý. 175 óreskel buzýshylyq anyqtaldy, onyń 152-si túngi klýbtarda, saýda ortalyqtary men meıramhanalarda, 23-i merekelik is-sharalara anyqtaldy. Jyl basynan beri Túrkistan oblysynda mobıldi toptar buzýshylyqtardy belsendi túrde anyqtady, bul el boıynsha anyqtalǵan buzýshylyqtardyń 458-in nemese 60%-ǵa jýyǵyn quraıdy. Sonymen qatar mınıstr E. Turǵymbaev qazirgi ýaqytta «qyzyl» aımaqqa kirgen oblystardaǵy toptardyń jumysynyń nasharlyǵyn aıtty.
«Atalǵan toptardyń jumys belsendiliginiń tómendeýine baılanysty, azamattar adamdar kóp jınalatyn jerlerde maska rejımin jıi buza bastady. Sonymen qatar turǵyndar arasynda vırýstyń qaýipsizdigi jáne vaksınalardyń tıimsizdigi týraly jalǵan aqparattyń taralý faktileri bar», – dedi Ishki ister mınıstri.
Osyǵan baılanysty Erlan Turǵymbaev óńirlerdiń ákimdikterimen jáne bas sanıtarlyq dárigerlerimen birlesken jumys aıasynda mobıldi toptardyń saýda ortalyqtarynda, mádenı mekemelerde aldyn alý jumystaryna basa nazar aýdarýyn, sondaı-aq osy mekemelerdiń ıelerimen shekteý sharalaryn buzýǵa jol bermeý týraly qatań túsindirý jumystaryn júrgizýdi uıymdastyrýdy usyndy. Jalpy quqyq qorǵaý vedomstvosynyń basshysynyń aıtýynsha, ishki ister organdary elimizde shekteý sharalaryn qamtamasyz etý jáne quqyqtyq tártipti saqtaý boıynsha barlyq qajetti sharalardy qabyldaýda.
