Soltústik Qazaqstan oblysynyń Petropavl qalasynda turǵyn úı kommýnaldyq sharýashylyǵyn jańǵyrtý baǵdarlamasyna bólingen qarjy talan-tarajǵa tústi. Bul týraly «KTK» telearnasy habarlady.
Sheneýnikter turǵyn úıdiń durys jóndelmegenin bile tura, merdiger kompanııanyń esep shotyna 1,7 mln.teńge aýdaryp jibergen. Qazir qalalyq ákimdiktiń birqatar qyzmetkerine qatysty qylmystyq is qozǵaldy. Ázirge olardyń esimderin quqyq qorǵaý qyzmetkerleri ataǵan joq.
«Ákimshilik qyzmetkerleri maǵan turǵyn úı qurylysyn basqa bir merdigerge tapsyrýǵa ıtermeledi. Naqty aıtqanda, Qanat Talǵatuly men Marııa Muhtarqyzy qatty qysym kórsetti»,-deıdi PIK tóraǵasy Vladımır Hamdıev.
Bizge kelip túsken sońǵy aqparda qalalyq turǵyn úı ınspeksııasy bóliminiń basshysy bolǵan Qanat Talǵatuly qyzmetinen bosatylǵany jazylǵan. Endi quqyq qorǵaý qyzmetkerleri kóterilgen máseleniń aq-qarasyn ashý úshin barlyq jaýapty tulǵalardan jaýap alatyn bolady.
Baqytbek Keneshuly.
Derekkóz: «KTK» telearnasy.
