2021 jyldyń 18 qańtarynda Jambyl oblysy Polısııa departamentiniń Esirtki qylmysyna qarsy is-qımyl basqarmasynyń qyzmetkerlerimen jedel-izdestirý is-sharalaryn júrgizý barysynda «Batys Eýropa-Batys Qytaı» avtojolynyń 260-shaqyrymynda Almaty qalasynyń 39 jastaǵy turǵynynyń basqarýyndaǵy «Golf-3» markaly avtokóligi toqtatyldy.
Avtokóliktiń júksalǵyshynan ishinde skotchpen oralǵan qaptary bar eki sómke tabylyp, jalpy salmaǵy 47 kg 850 grammdy quraıtyn gashısh esirtki zaty anyqtalǵan.
Atalǵan derek boıynsha Qylmystyq kodekstiń 297-baby 3-bóligimen (Esirtki zattaryn ótkizý maqsatynda asa iri mólsherde zańsyz saqtaý) sotqa deıingi tergeý amaldary júrgizilýde. Kúdikti óz kinásin moıyndap, Qordaı aýdanynyń ýaqytsha ustaý ızolıatoryna qamaqqa alyndy.
«Osy qylmysty jasaǵany úshin múlki tárkilenip, on jyldan on bes jylǵa deıingi merzimge bas bostandyǵynan aıyrý jazasy kózdelgen», dep málimdedi Polısııa departamentiniń Esirtki qylmysyna qarsy is-qımyl basqarmasynyń bastyǵy Asqar Jumabekov.
