Astanada «Nur Otan» partııasynyń qoldaýymen «Jas tulpar» jastar syılyǵy ıegerlerin saltanatty marapattaý ótti. Áıgili «Jas tulpar» qozǵalysynyń 50 jyldyǵy men el Táýelsizdigi merekesine oraı alǵash ret ótkizilgen bul sharany «Nur Otan» partııasy Tóraǵasynyń birinshi orynbasary Baýyrjan Baıbek quttyqtaý sózben ashty.
Astanada «Nur Otan» partııasynyń qoldaýymen «Jas tulpar» jastar syılyǵy ıegerlerin saltanatty marapattaý ótti. Áıgili «Jas tulpar» qozǵalysynyń 50 jyldyǵy men el Táýelsizdigi merekesine oraı alǵash ret ótkizilgen bul sharany «Nur Otan» partııasy Tóraǵasynyń birinshi orynbasary Baýyrjan Baıbek quttyqtaý sózben ashty.
«Nur Otan» partııasynyń jańa Saıası doktrınasynda «Jastardy otanshyldyqtyń arqaýynda tárbıeleý árqashanda Qazaqstannyń tabysqa jetýi men órkendeýiniń kepili bolmaq», dep kórsetilgen. Sondyqtan jastar arasynda tól mádenıetti damytý men otanshyldyqty nyǵaıtýǵa qosqan úlesi úshin tuńǵysh ret partııa tarapynan «Jas tulpar» syılyǵyn tabystaý týraly sheshim qabyldandy», dedi B.Baıbek.
Sonymen, «Jas tulpar» syılyǵynyń tuńǵysh ıegerleri dep tómendegi azamattar tanyldy.
Nurlan Álimjan. Akter, sazger, ánshi. Qazaqstandyqtarǵa el Prezıdenti jaıly túsirilgen «Elbasy joly» atty kınoepopeıanyń basty keıipkeri retinde tanylǵan talant ıesi.
Danııar Eleýsinov. Bokstan elimizdiń birneshe dúrkin chempıony. 2013 jyly Almatyda ótken álem chempıonatynda 69 kıloǵa deıingi salmaqta álem chempıony atanyp, el mereıin ústem etken sańlaq.
Jansaıa Ábdimálik. Oqýshylar arasyndaǵy úzdik shahmatshy tıtýlynyń ıegeri. Jeti jasynda birinshi razrıad normasyn oryndaǵan ol 2008 jyly 20 jasqa deıingi qyzdar arasynda elimizdiń absolıýttik chempıony boldy. Dál sol jyly J.Ábdimálik Iranda ótken Azııa chempıonatynda jeńiske jetip, shahmat tarıhynda eń jas Azııa chempıony atandy. Sondaı-aq, ol ótken jyly maýsymda qyzdar arasyndaǵy eń jas grossmeıster ataǵyn ıelendi.
Ibragım Eskendir. «Jas Otan» jastar qanatynyń belsendisi, patrıottyq ánder baıqaýlarynyń jeńimpazy. Onyń júreginen shyqqan «Kók týdyń jelbiregeni», «Amanat», «Birlik urany», «Láıla», «Ǵashyqtyń tili», «Qyzdy nege jylattyń?» ánderi halyqqa keńinen tanymal. Onyń «Kók týdyń jelbiregeni» áni London Olımpıadasy kezinde sportshylarymyz ben jankúıerlerge patrıottyq rýh syılap, senim otyn jalyndatty.
Turar Artyqbaev. Polısııa kapıtany, Shymkent qalasynda ýchaskelik ınspektor bolyp qyzmet isteıdi. Memlekettik marapat – «Erligi úshin» medaliniń ıegeri. О́ziniń qyzmettik mindetin oryndaý kezinde erlikke baryp, qylmyskerdiń jolyna tosqaýyl qoıý úshin atylǵan oqqa keýdesin tosqan bolatyn.
Erkin Beısekenov. Aqtóbede órt sóndirý jáne apattyq-qutqarý jumystary qyzmetinde órt sóndirýshi-qutqarýshy bolyp qyzmet etedi. «Erligi úshin» jáne III dárejeli «IIM-ge adal qyzmeti úshin» medaldarymen marapattalǵan. 2013 jyldyń shildesinde tún ishinde turǵyn úılerdiń birinde bolǵan órtten 4 balany arashalap qalǵan ol ózi de úsh balanyń ákesi.
Artýr Sýleımanov. Shyǵarmashylyq laqap aty – Emir France. Ártis, Almaty qalasynyń Blow Money leıbliniń reperi. Onyń beıneklıpteri úlken suranysqa ıe bolyp, ǵalamtorda tamashalaýshylardyń sany birneshe esege artqan. Atap aıtsaq, UpGrade feat-pen birlesip jazǵan shyǵarmalary: «Kazakhstan» – 230 384 ret, «Kıeli meken» – 78 359 ret qaralypty.
Júldelerdi Myrzataı Joldasbekov, Qýanysh Sultanov, Murat Áýezov, Máýlen Áshimbaev, Bekbolat Tileýhan syndy elimizge belgili azamattar tabys etti. «Jas tulpar» syılyǵy kásibı eren tabysy úshin 35 jasqa deıingi qazaqstandyqtarǵa jylyna bir ret berilmek.
Ábdirahman QYDYRBEK,
«Egemen Qazaqstan».
Sýretterdi túsirgen
Erlan OMAROV,
«Egemen Qazaqstan».
