«AMО́Z» JShS-niń qoǵammen baılanys qyzmetiniń málimetinshe, sońǵy jyldary zaýytta shyǵarylatyn ónim túrleri kóbeıe tústi. О́tken jyly Qazaqstandaǵy eń tómengi temperatýraǵa shydamdy «Khazar-38» dızel otynyn óndirý bastalǵan edi. Endi sondaı ónimniń qataryna «Altay-45» qysqy dızel otyny qosyldy.
– «Altay-45» markaly dızel otyny munaıdy tereń óńdeý kesheniniń Prime D 3205 dızel otynyn gıdrotazartý qondyrǵysynda shyǵaryldy. Jańa ónim K5 klasynyń ekologııalyq talaptaryna sáıkes keledi. Kúkirttiń mınımaldy mólsheri jáne tómen temperatýralyq qasıetin jaqsartatyn qospalardyń bolmaýy ónimdi arktıkalyq dızel otynynyń sapasyna sáıkes etedi. Jańa dızel otynynyń birinshi partııasy ishki naryqtaǵy suranysty qamtamasyz etý úshin shaǵyn kólemde óndiriledi. Odan ári suranysqa qaraı «Altay-45» dızel otynyn tıeý kólemi ulǵaıtylatyn bolady, – dep habarlady kásiporynnyń qoǵammen baılanys qyzmeti.
Atalǵan zaýytta taǵy bir jańalyq bar. Bul – zaýytta shyǵarylǵan janarmaıdyń REACH sertıfıkatyn ıelenýi. Osyǵan baılanysty Eýroodaq naryǵyna ımporttaýǵa arnalǵan hımııalyq zattar men olardyń qospalarynyń sapa deńgeıin baǵalaýdyń tolyq rásiminen ótti.
Kásiporynnyń qoǵammen baılanys qyzmetiniń málimetine súıensek, REACH reglamentine sáıkes, Eýroodaqta jylyna 1 tonnadan astam mólsherde óndiriletin nemese ımporttalatyn kez kelgen hımııalyq zat tirkeýge jatady. Al REACH sertıfıkaty – eýroaımaq elderine benzın shyǵaratyn qazaqstandyq kásiporynnyń eksporttyq múmkindigin damytýdaǵy mańyzdy qadam.
Mundaı sertıfıkat byltyrǵy sáýirde Atyraý munaı óńdeý zaýytynyń óndirisindegi hosh ıisti kómirsýtekter – benzol jáne paraksılol ónimderi úshin de berilgen edi. Al qazaqstandyq janarmaı eýropalyq sapa standarttaryna sáıkestigi rastalǵan úshinshi ónim bolyp otyr. Endi REACH sertıfıkaty Atyraýda shyǵarylǵan janarmaıdyń Eýroodaq elderiniń naryǵyna shyǵýyna dańǵyl jol ashady.
Atyraý oblysy
