Qoıýshy rejısser Ernazar Jańatilektiń saraptaýynda kórermenimen qaýyshqan aıtýly drama jasóspirimder ómirinen syr shertedi. Olardyń adamǵa, qoǵamǵa, qorshaǵan ortaǵa degen kózqarastary, kúndelikti ómirdegi bir-birimen qarym-qatynastary balalyq psıhologııanyń sheńberinen shyqpaǵanymen, jasóspirimder ǵana emes, eresek adamdarǵa da oı salatyn kórkem sheshimderge qurylǵan.
«Aǵaıyndy Karamazovtar» – 1878-1880 jyldary jazylǵan F.Dostoevskııdiń sońǵy romany. Álem ádebıetindegi úzdik týyndylardyń biri retinde baǵalanady. F.Dostoevskıı aıtýly týyndysynda adam ómiriniń negizgi máselelerin alǵa qoıady. Ár adamnyń ómiri men búkil adamzat tarıhynyń máni, adam bolmysynyń moraldyq jáne rýhanı negizderi týraly máseleler qarastyrylǵan.
Qazirgi qoǵamnyń ózekti máseleleriniń biri – bala tárbıesi. Olardyń kóretini men estıtini, elikteýi, er jetýi men boı jetýi syndy mańyzdy kezeńderinde ata-analardyń balalaryna erekshe kóńil aýdaryp, qadaǵalap otyrýy negizindegi oılardy da atalǵan qoıylym alǵa tartady. Adamnyń aınalasyndaǵy árbir janǵa syılastyqpen qarap, olarǵa laıyqty túrde qurmet kórsete bilýi – adamgershilik pen aqyl-parasattyń asqar bıigi bolsa kerek. Osy talap bıiginen kelgende, tór qalanyń Mýzykalyq jas kórermen teatry usynǵan «Uldar» qoıylymynyń kórermenine berer taǵylymy mol.
Spektaklde Ilıýsha (bozbala) róli teatr ártisteri Elaman Imanbaev pen Dinıslam Nurmaǵambetov, Nıkolaı Krasotkın – «Daryn» Memlekettik jastar syılyǵynyń laýreaty Asylhan Tólepov pen Salamat Muqashev, Alekseı Karamazov – Abzal Arapov, «Daryn» Memlekettik jastar syılyǵynyń laýreaty Aıan О́tepbergen, Smýrov – Imanǵalı Aqádil, Snegırev beınesi – Altynbek Súndet pen Shyńǵys Telmanov syndy talantty akterler oıynynda sátti saraptaldy.
Astanalyq jas kórermender teatrynyń jańa jyldaǵy usynyp otyrǵan alǵashqy premerasy kórermendi meıirimdilikke, adamgershilikke, senimdilikke shaqyrady. Mysaly, Ilıýsha kim? Ol tekten-tekke batyr bolyp ketken joq. Bala júrek namys pen kektiń arasyn ajyrata almaı qaldy. Shyǵarma qandaı jaǵdaı bolsa da adam balasy óziniń asyl qasıetterin joǵaltpaı, adam bolyp qalý kerektigin dáripteıdi. Qoıylym sonysymen de qundy.
