Emhana kesheni elordanyń halyq kóp shoǵyrlanǵan aýdanynda, Jambyl jáne Seıfýllın kósheleriniń qıylysynda qonys tepken. Bul nysan Elbasynyń tikeleı bastamasymen ómirge kelgen «100 mektep, 100 aýrýhana» memlekettik baǵdarlamasy sheńberinde paıdalanýǵa berilip otyr. №10 ambýlatorııalyq-emhana alǵashqy kezeńde bir aýysymda 500 adamǵa qyzmet kórsetip, 65 myń qala turǵynyn medısınalyq qyzmetpen qamtamasyz etýge arnalǵan. Bolashaqta emhananyń áleýeti bir aýysymda 750 adamǵa, jalpy, 95 myń qala turǵynyna medısınalyq qyzmet kórsetpek.
Emhana kesheni elordanyń halyq kóp shoǵyrlanǵan aýdanynda, Jambyl jáne Seıfýllın kósheleriniń qıylysynda qonys tepken. Bul nysan Elbasynyń tikeleı bastamasymen ómirge kelgen «100 mektep, 100 aýrýhana» memlekettik baǵdarlamasy sheńberinde paıdalanýǵa berilip otyr. №10 ambýlatorııalyq-emhana alǵashqy kezeńde bir aýysymda 500 adamǵa qyzmet kórsetip, 65 myń qala turǵynyn medısınalyq qyzmetpen qamtamasyz etýge arnalǵan. Bolashaqta emhananyń áleýeti bir aýysymda 750 adamǵa, jalpy, 95 myń qala turǵynyna medısınalyq qyzmet kórsetpek.
Halyq sany kúnnen-kúnge qaýlap ósip otyrǵan megapolısimizde emhana jetimsizdigi kópten beri tilge tıek etilip keledi. Osy problemany jeńildetý maqsatynda paıdalanýǵa berilip otyrǵan jańa emhana buryn №4 qalalyq emhanaǵa qarasty 45 myń adamǵa jáne №5 qalalyq emhanaǵa qarasty 20 myń adamǵa qyzmet kórsetetin bolady. Sóıtip, №4, №5 qalalyq emhanalardyń jumys aýqymy belgilengen standarttarǵa sáıkes shaqtalyp, jalpy, sol jaǵalaýdyń turǵyndaryna medısınalyq qyzmet kórsetý sapasyn arttyrýǵa qolaıly jaǵdaı jasaıdy.
№10 emhanada 22 joǵary bilimdi dáriger jumys isteıtin bolady. Emhana búgingi ozyq tehnologııaǵa negizdelgen zamanaýı medısınalyq qural-jabdyqtarmen jaraqtandyrylǵan. Keshen jalpy kólemi 20 661,8 sharshy metrdi quraıtyn, úsh bloktan turatyn 5 qabatty ǵımaratta ornalasqan. Onyń quramyna emdik-aldyn alý jáne konsýltasııalyq-dıagnostıkalyq bólimder, otbasy densaýlyǵy ortalyǵy, ambýlatorııalyq hırýrgııa ortalyǵy, qalpyna keltirý terapııasy, jastar densaýlyǵy ortalyqtary kiredi.
Jańa emhanada qalamyzda jumys isteıtin №5 jáne №8 emhanalardaǵy sııaqty naýqastardyń sanyn ońtaılandyrýǵa jáne tirkeý bóliminiń jumys úderisin qalypqa keltiretin elektrondyq kezek júıesi engizilgen. Bul júıe naýqastarǵa qyzmet kórsetý sapasyn arttyryp, emhanadaǵy kezek retin azaıtady. Odan basqa, atalǵan emhanada «Smart Astana» jobasy sheńberinde qala turǵyndarymen jumys isteý úshin biryńǵaı medısınalyq aqparattyq Call-ortalyǵyn ashý boıynsha qanatqaqty joba josparlanýda. Onyń qyzmetkerleri densaýlyq saqtaý salasynda azamattardyń shaǵymdary men aryzdaryn qarap, qabyldaıdy, halyqqa anyqtamalyq jáne konsýltasııalyq kómek kórsetedi. «Smart Astana» jobasynyń negizgi tapsyrmasy, turǵyndarǵa sapaly medısınalyq qyzmet kórsetýdi jaqsartýǵa kómegin tıgizetin bir aqparattyq jolda Astana qalasynyń barlyq medısınalyq mekemeleriniń birigýi bolyp tabylady.
Jańa densaýlyq saqtaý mekemeleriniń ashylýy qala emhanalarynyń júktemesin edáýir tómendetýge múmkindik beredi. Eske sala ketsek, 2012 jyldyń sońynda Amanat kóshesinde aýysymyna 500 adamǵa qyzmet kórsetetin emhana jáne 250 adamǵa arnalǵan emhanasy bar kópsalaly balalar aýrýhanasy ashylǵan bolatyn. Aǵymdaǵy jyldyń qarashasynda №1 perınataldyq ortalyq bazasynda 250 adamǵa arnalǵan BMSK ortalyǵy ashylǵan. Atqarylǵan sharalar kesheni 2014 jyldyń ortasynda Qazaqstannyń astanasynda ambýlatorııalyq-emhanalyq júıe júktemesi boıynsha másele tolyq sheshimin tabatyndyǵyna negiz bolady.
Sonymen birge, Táýelsizdik merekesi qurmetine juma kúni Astana qalasynyń ákimi Imanǵalı Tasmaǵambetov saltanatty jaǵdaıda Qalalyq jedel medısınalyq járdem stansasyna (QJMJS) 23 jańa jedel járdem avtokóligin tapsyrdy. Ústimizdegi jyldyń 1 jeltoqsanǵa deıingi jaǵdaı boıynsha QJMJS-nyń balansynda 74 jedel járdem mashınasy bolatyn. Onyń turaqty túrde 62-si paıdalanylyp keldi. Qalǵandary kúrdeli jóndeýdi qajet etetin eski kólikter edi. QJMJS-nyń bazasy birden 23 jańa mashınamen tolyǵýyna baılanysty qala turǵyndaryn jedel medısınalyq járdem qyzmetimen qamtamasyz etý sapasy jaqsardy.
Jańa 23 jedel járdem mashınalarynyń 6-ýy jalpy quny 113,928 mıllıon teńge bolatyn Hyundai markaly avtomobılder bolsa, 17-si jalpy quny 227,37 mıllıon teńge bolatyn «Gazel» markaly avtomobılder. Bul jedel járdem kólikteri búgingi zamannyń ozyq medısınalyq jabdyqtarymen jaraqtandyrylǵan. Jańa avtomobılder respýblıkalyq bıýdjetten arnaıy bólingen qarjy esebinen alyndy. Qalalyq jedel medısınalyq járdem stansasynyń avtokólik kesheniniń jańa mashınalarmen tolyǵýy qala turǵyndaryna kórsetiletin jedel medısınalyq járdem sapasynyń jańa deńgeıde kóterilýine múmkindik beredi.
Jylqybaı JAǴYPARULY,
«Egemen Qazaqstan».
Sýretti túsirgen
Erlan OMAROV.
