Oblystyq polısııa departamenti baspasóz qyzmetiniń málimetinshe, ótken jyly túngi saǵat 23:00-den kóshe kezetin 1500-ge jýyq jasóspirim anyqtalypty. Balalarynyń qaıda júrgenine beıhabar ata-analary ákimshilik jaýapkershilikke tartyldy.
«Polısııa qyzmetkerleri bıylǵy jyl basynan beri qoǵamdyq orynda ishimdik iship júrgen 20-ǵa jýyq jasóspirimdi anyqtady. Sonyń biri – Qyzylqoǵa aýdanynan kelgen 17 jasar bozbala. Ol túngi saǵat 23:30 shamasynda «Isataı-Mahambet» alańynda ata-anasyz júrgen. Tekserý kezinde onyń masań kúıde júrgeni belgili boldy. Ol dostarymen birge syra ishkenin moıyndady» -dep habarlady departamenttiń baspasóz qyzmeti.
Alys aýdanda turatyn ata-anasy ulynyń syra iship, mas bolyp júrgeninen habarsyz eken. Degenmen onyń ata-anasy shaqyrtylyp, olarǵa qatysty QR Ákimshilik quqyqbuzýshylyq týraly Kodeksiniń 442-babynyń 2-bóligimen eskertý berildi. Sondaı-aq atalǵan Kodekstiń 440-babynyń 2-bóligimen 5 aılyq eseptik kórsetkish kóleminde aıyppul salyndy.
