О́tken táýlikte qalada COVID-19 ınfeksııasyn juqtyrǵan 14 jaǵdaı tirkelgen. Bul baǵytta kóbeıý úrdisi baıqalýda. Búginde shaharda 1 060 tósek - oryn bar (juqpaly - 560, karantın - 500), onyń 864 tósek – orny bos. Juqpaly jáne karantındik aýrýhanalarda 196 naýqas em qabyldaýda.
Qala ákimi aptalyq efırdi bilim salasyna arnady. Bul jóninde óziniń jeke paraqshasynda habarlap, turǵyndardan suraqtar men usynystaryn jazba astyna jazyp qaldyrýyn suraǵan bolatyn. Turǵyndar tarapynan taqyryp tóńireginde 200-den astam pikir qaldyrylǵan.
Murat Dúısenbekuly bilim tóńiregindegi máselelerdi talqyǵa salyp, sala boıynsha suraqtarǵa jaýap berdi, aldaǵy josparlarmen bólisti.
Osy jyly qaladaǵy memlekettik 5 kolledjdi jabdyqtaý úshin respýblıkalyq bıýdjetten 1 447,772 mln teńge qarjy qaralǵan.
Qyrkúıek aıyna deıin kolledjderdiń materıaldyq-tehnıkalyq bazasy 70% jańartylady.
Sonymen qatar ótken jyly mektepke deıin bilim berýde jan basyna qarjylandyrý ár balaǵa 28 350 teńge bolsa, bıyl 37 527 teńge retinde bekitilgen.
Kórý qabileti nasharlar úshin «Braıl» jáne zerde buzylystary bar balalar úshin «SATR» baspasynan arnaıy kitaptar alynyp, arnaıy oqýlyqtar qory tolyǵatyn bolady.
Efır sońynda qala ákimi qalada epıdemııalyq jaǵdaı turaqty bolǵanymen áli de saqtyq sharalaryna mán berý qajet ekenin atap ótti.
Efırde turǵyndardan kelip túsken suraqtardyń barlyǵyna mindetti túrde jaýap beriletinin aıta kele, kelesi apta turǵyn úı tóńireginde sóz qozǵalatynyn málimdedi.
