Keshe elordadaǵy Qazaq ulttyq óner ýnıversıtetiniń «Shabyt» shyǵarmashylyq saraıynda bilim jáne ǵylym salasy boıynsha memlekettik jáne vedomstvolyq marapattardy tapsyrý rásimi ótti.
Keshe elordadaǵy Qazaq ulttyq óner ýnıversıtetiniń «Shabyt» shyǵarmashylyq saraıynda bilim jáne ǵylym salasy boıynsha memlekettik jáne vedomstvolyq marapattardy tapsyrý rásimi ótti.
Marapattaý rásiminde sóz alǵan Bilim jáne ǵylym mınıstri Aslan Sárinjipov Elbasynyń bastamasymen qolǵa alynǵan bilim salasyndaǵy jobalar qazaqstandyq bilimniń júıeli damýyna áser etkenin baıandady. «Prezıdenttiń «Bolashaq» baǵdarlamasy – onyń aıqyn dáleli. Búgingi kúni Nazarbaev zııatkerlik mektepteri óńirlerdegi ınnovasııalardyń resýrstyq ortalyqtary bolyp tabylady. Olar óz tájirıbelerin elimizdiń mektepterine taratýda.
Tehnıkalyq jáne kásiptik bilim berý júıesinde «Kásipqor» holdıngi» álemdegi aldyńǵy qatarly tájirıbelerdi engizetin júıeli operator retinde jumys isteıdi» – degen mınıstr ǵylymnyń basty mindeti – ǵylymı zertteýlerdiń tıimdiligi men sapasyn arttyrý ekenin atap ótti. Ol joǵary bilim berý júıesinde jańa, biregeı álemdik deńgeıdegi joba – Nazarbaev Ýnıversıtetiniń qurylyp, tabysty damýyna kýá bolyp otyrǵanymyzdy, ýnıversıtettiń elimizdegi basqa da aldyńǵy qatarly joǵary oqý oryndaryn damytý úshin bilim, ǵylym jáne ınnovasııany sıntezdeýge baǵyttalǵan «bolashaq modeli» ekenin de baıandady.
«Búginde mektepke deıingi, orta, kásiptik jáne joǵary bilim, ǵylym jáne jastar saıasaty jańa baǵyt aldy. Odan ári damýdyń negizgi joldary anyqtaldy. Aldaǵy úsh jylǵa arnalǵan bilim berýdi damytýdyń negizgi basymdyqtary Úkimet tarapynan qoldaý tapty» degen mınıstr bilim jáne ǵylym salasy boıynsha bıylǵy marapattaýlarǵa laıyq bolǵan otandastarymyzǵa nagradalaryn tapsyrdy.
Sonymen, bıyl bilim jáne ǵylym salasy boıynsha «Parasat» ordenimen T.Rysqulov atyndaǵy Qazaq ekonomıkalyq ýnıversıtetiniń professory Keńes Berdalıev, Q.Sátbaev atyndaǵy Qazaq ulttyq tehnıkalyq ýnıversıtetiniń kafedra meńgerýshisi Baıan Raqyshev marapattaldy. II dárejeli «Dostyq» ordenin Qazaq ulttyq óner ýnıversıtetiniń kafedra meńgerýshisi, belgili ánshi Qaırat Baıbosynov ıelendi. Ál-Farabı atyndaǵy QUÝ professory Ajar Jubanova, Abaı atyndaǵy QUPÝ professory Nına Ishmuhamedova, «Ulttyq ǵylymı medısınalyq ortalyǵy» AQ balalar kardıohırýrgııa bóliminiń basshysy Dmıtrıı Gorbýnov, T.Rysqulov atyndaǵy Qazaq ekonomıkalyq ýnıversıtetiniń rektory Serik Svıatov, «Parasat» Ulttyq ǵylymı-tehnologııalyq holdıngi basqarma tóraǵasynyń orynbasary Lázzat Myltyqbaevanyń óńirlerine «Qurmet» ordeni taǵyldy. Sondaı-aq, bilim jáne ǵylym salasy boıynsha birqatar professorlar men oqytýshylar «Eren eńbegi úshin» medalimen, «Qazaqstannyń eńbek sińirgen qaıratkeri» qurmetti ataǵymen, Qazaqstan Respýblıkasynyń Qurmet gramotasymen, Qazaqstan halqy Assambleıasynyń qoǵamdyq «Birlik» altyn medalimen marapattaldy.
Aıgúl SEIILOVA,
«Egemen Qazaqstan».
