Byltyr tamyz-qyrkúıek aılarynyń basynda elimizdiń Veterınarlyq baqylaý jáne qadaǵalaý komıteti Reseı Federasııasynyń keıbir aımaqtarynan Qazaqstan aýmaǵyna tiri qus pen qus sharýashylyǵy ónimderin alyp kelýge jáne olardyń tranzıtine ýaqytsha shekteý engizgen edi. Biraq salalyq mınıstrlik tarapynan júrgizilgen jedel sharalarǵa qaramastan joǵary patogendi qus tumaýy elimizdiń 8 óńirine jabaıy qustardyń qonys aýdarýy saldarynan taraǵan bolatyn.
Epızootııaǵa qarsy is-sharalardyń aıaqtalýyna oraı jáne qustar ólim-jitiminiń jańa jaǵdaılary tirkelmegendikten qazir osy óńirlerde karantın alynyp tastaldy.
Aýrý oshaqtaryn oqshaýlaý jáne joıýǵa baılanysty is-sharalar barysynda 1,9 mln qus joıyldy, onyń 97%-y 4 qus fabrıkasyna tıesili.
2020 jyldyń jeltoqsanynda Veterınarlyq baqylaý jáne qadaǵalaý komıtetiniń «Respýblıkalyq epızootııaǵa qarsy otrıad» kásiporny ortasha aılyq naryq quny boıynsha indettiń kesirinen shyǵynǵa ushyraǵan qus ıelerine ótemaqy tóleý jumystaryn júrgizdi.
Veterınarlyq-sanıtarlyq qaǵıdalarǵa sáıkes, tárkilengen jáne joıylǵan qustardyń qunyn óteý «Joǵary patogendi qus tumaýy» indetinen ólgenin rastaıtyn qujattar negizinde atqaryldy. Qujat bolmaǵan jaǵdaıda tólem júrgizilmeıtinin eskertti vedomstvo ókilderi.
«Barlyq usynylǵan qujat boıynsha tólem tolyq kólemde júrgizildi. Atap aıtqanda, jeke qosalqy sharýashylyqtarǵa 94 470 bas úshin 295,3 mln teńge tólendi. «Agroınterptısa» JShS-na 433 066 qus úshin 445,9 mln teńge berildi», delingen taratylǵan aqparatta.
Quzyrly organnyń málimetine súıensek, búginde Veterınarlyq baqylaý jáne qadaǵalaý komıtetiniń «Respýblıkalyq epızootııaǵa qarsy otrıad» kásipornynda tólenbegen qaryz qalǵan joq.
