Almaty qalasynyń ákimi B.Saǵyntaev erekshe qajettilikteri bar balalarǵa arnalǵan oqý barysyn uıymdastyrýdyń jaǵdaılarymen tanysý barysynda №7 arnaıy túzetý mektep-ınternatynda bolyp, qolǵa alynǵan sanıtarlyq-epıdemııalyq qaýipsizdik sharalardy kórip qaıtty. Osy oraıda qala basshysy erekshe qajettilikteri bar balalarǵa qoldaý kórsetip, olardyń jan-jaqty damýyna barynsha jaǵdaı jasalatyndyǵyna toqtaldy. Erekshe qajettilikteri bar balalardy áleýmettendirý ońaı emestigin alǵa tartqan B.Saǵyntaev bala tárbıesinde ata-analardyń da shydamdy bolýy qajettiligin atap ótti.
Jańa toqsannyń bastalýyna baılanysty qaladaǵy mektepterde kezekshi toptardyń sany artqanyn atap ótken qala basshysy bul baǵytta múmkindigi shekteýli balalarǵa erekshe kóńil bólinetindigin jetkizdi. Mektepte 216 bala bilim alsa, 200 balaǵa úı jaǵdaıynda sabaq beriledi. Balalarǵa áleýmettik-psıhologııalyq ońaltý men beıimdeý, shyǵarmashylyq áleýetin damytý, eńbekke baýlý úshin barlyq jaǵdaı jasalǵan. Tigin nemese aǵash ustasy isiniń qyr-syryn meńgere otyryp, jasóspirimder 9-synyptan keıin kolledjge túsip, mamandyq alýyna da jaǵdaılar qarastyrylǵan. Sondaı-aq bul mektepte emdik dene shynyqtyrý, mýzyka men bı boıynsha sabaqtar ótedi.
ALMATY
