Aqtóbe qalalyq ishki ister departamentiniń bastyǵy, podpolkovnık Qaırat Myrzabekovke qyzmet bólmesinde qaramaǵynda isteıtin polıseı qyzdy urdy degen aıyp tańylyp jatyr. Bul týraly «Dıapozon» gazeti jazdy.
Basylym betinde jazylǵandaı, ınsıdent 24 qarasha kúni oryn alǵan. Osy oqıǵaǵa baılanysty biraz jaraqtat alǵan 30 jastaǵy polıseı qyzdyń aýrýhanaǵa túskendigi týraly aqpar jergilikti jerge lezde tarap ketti. Artynan oblystyq ishki siter departamentine óziniń bastyǵynyń ústinen aryz jazǵany málim boldy. Polısııa basynda bul oqıǵaǵa baılanysty buqaralyq aqparat quraldary ókilderine túsinikteme berýden bas tartypty. Jeltoqsannyń 6-sy kúni ǵana shaǵyn habar aıtyldy.
«Fakti boıynsha qylmystyq is qozǵaldy. Tergeýmen ishki qaýipsizdik basqarmasy aınalysyp jatyr. Qylmystyq istiń búge-shigesi tergeý múddesine baılanysty qupııa ustalady», – dedi polısııadaǵylar.
Resmı emes derek kózderi qalanyń bas polıseıin qamaý jóninde sot sanksııaǵa qol qoıǵanyn alǵa tartady. Al qalalyq ishki ister basqarmasynyń kezekshi bólimi bastyqtyń emdelip jatqanyn málimdegen.
Bul aralyqta soqqy alǵan qyzdyń jansaqtaý bólimine túsip qalǵany, onyń esigin eki polıseıdiń kúzetip otyrǵany týraly da qaýeset tarady. Alaıda, aýrýhana dárigerleri osy aıtylǵandy joqqa shyǵardy. Olar qyzdyń bir kúnnen keıin-aq aýrýhanadan shyǵyp ketkenin jetkizipti.
Qaırat Myrzabekov Aqtóbe qalasy ishki ister basqarmasyna polkovnık Esen Esmahanov zeınetke ketkennen keıin, byltyrǵy jyldyń qazan aıynda bastyq bolyp kelgen. Buǵan deıin Hromtaý aýdandyq ishki ister bólimin basqarǵan eken.
Baqytbek Keneshuly.
Derekkóz: «Dıapozon» gazeti.
