Qazaqtyń belgili aqyny, Qazaqstan Jazýshylar odaǵynyń múshesi Qaırat Jumaǵalıev 77-ge qaraǵan shaǵynda qaıtys boldy. Bul týraly «Qazaqstan» telearnasy habarlady.
Qaırat Jumaǵalıev 1937 jyly 16 qyrkúıekte Oral oblysy Orda aýdany Qosshy aýylynda týǵan. 1959 jyly Qazaq memlkettik ýnıversıtetiniń fılologııa fakýltetin bitirgen.
Q.Jumaǵalıev 1959-1984 jyldary «Jazýshy» baspasynda kishi redaktor, redaktor, aǵa redaktor, redaksııa meńgerýshisi, bas redaktordyń orynbasary, 1985-1992 jyly «Qazaqteleradıo» komıtetinde aǵa redaktor, kommentator, redaksııa meńgerýshisi, bas redaktor, 1992-1996 jyldary Qazaqstan Parlamenti Senatynyń aýdarma-redaksııalyq bóliminde sektor meńgerýshisi, keńesshi boldy. Keıingi kezderi «Saryarqa» jýrnalynda redaktor bolyp qyzmet etti.
Aqynnyń alǵashqy shyǵarmalary 60-jyldardyń basynda jarııalana bastady.Alǵashqy óleńder jınaǵy «Tuńǵysh» 1964 jyly jaryq kórgen. Osy kezge deıin onyń qalamynan týǵan óleńder 30 kitapqa jınaqtaldy. Birqatar shyǵarmalary orys tiline tárjimalanyp, kitap bolyp basylǵan. Jeke óleńderi aǵylshyn, fransýz, arab, nemis, qytaı, hındı, ıspan, polıak jáne bolgar tilderine aýdarylǵan. О́zi fransýz, mońǵol aqyn-jazýshylarynyń romandaryn qazaq tiline aýdarǵan. Aqyn óleńderine kóptegen ánder jazylǵan.
Qalamger Belarýs Respýblıkasynyń Qurmet gramotasymen, Qazaqstan Joǵary Keńesiniń Qurmet gramotasymen, «Tyń jáne tyńaıǵan jerlerdi ıgergeni úshin», «Eńbektegi erligi úshin» medaldarymen, KSRO jáne Qazaqstan Jazýshylar odaǵynyń gramotalarymen marapattalǵan.
Qaırat Jumaǵalıevti aqyrǵy saparǵa shyǵaryp salý 20 jeltoqsan kúni Almatyda ótedi.
Sáken Maılybaı.
Derekkóz: Qazaqstan telearnasy.
