«Oblystaǵy elektr jelileriniń 80 paıyzy tozǵan. Belgili nárse. Apattar jıi bolyp, elektr qýaty qaıta-qaıta úzile beredi. Mysaly, 2020 jyly 182 ret elektr qýaty úzilgen. Bul máseleni sheshý úshin qandaı sharalar qabyldanýda?», dep Memleket basshysy atalǵan óńirdiń ákimi Ǵalı Esqalıevten surady.
Oblys basshysy óńirdegi aýyldyq eldi mekenderdiń sanyna baılanysty elektr jelisiniń uzaqtyǵy 20 myń shaqyrymnan asatyndyǵyn jáne tozýy 80 paıyzǵa jýyqtaıtynyn jasyrmady.
«Sonyń kesirinen eldi mekenderde, ásirese aýyldarda elektrmen jabdyqtaý turaqsyz bolyp tur. Sonymen qatar eki aýdanymyz elektr qýatyn Reseıden satyp alyp otyr. Iаǵnı, elektr jelilerin qalpyna keltirý jáne 2 aýdanǵa elektr jelisin tartý ózekti másele. Ony sheshý úshin tıisti is-sharany qoldanyp jatyrmyz. Qazirgi kezde Úkimettiń qoldaýymen aımaqtyq elektr taratý kompanııasynyń aksııalary kommýnaldyq menshikke alynýda. Keıin Úkimetpen kelisip, elektr jelilerin qalpyna keltirý úshin «Nurly jer» baǵdarlamasyna tıisti ózgertýler usynatyn bolamyz», dep jaýap berdi oblys ákimi.
