Memleket basshysynyń tapsyrmasy boıynsha 2021 jylǵy aqpannan Qazaqstan Respýblıkasynda halyqtyń vaksınasııalaýǵa jatatyn toptaryna koronavırýstyq ınfeksııasyna qarsy vaksınasııa bastalady dep josparlanyp otyr. Vaksınasııa vaksınanyń jetkizilýin jáne halyqtyń ártúrli toptarynyń epıdemıologııalyq mańyzdylyǵyn eskere otyryp, kezeń-kezeńmen júzege asyrylady. Birinshi kezeńde, ıaǵnı aqpannan medısına qyzmetkerleri, ınfeksııalyq aýrýhanalardyń, jedel medısınalyq járdemniń qyzmetkerleri egý saldyrady. Ekinshi kezeńde naýryzdan bastap pedagog, kúsh qurylymdarynyń qyzmetkerleri, sáýirden bastap stýdentter vaksına saldyrady. Alaıda, vaksınasııa 18 jasqa tolmaǵan balalarǵa usynylmaıdy, sebebi vaksınany bul jas erekshelik tobynda qoldaný áli zerdelenbegen. Vaksınany tek QR kámeletke tolǵan azamattary ǵana ala alady. 6 mln adamdy qamtı otyryp, jyl sońyna deıin KVI-ǵa qarsy vaksınasııalaý jalǵasady dep josparlanýda.
«Vaksınasııa profılaktıkalyq egýge qarsy kórsetkishi joq adamdarǵa ruqsat etiledi. Vaksınasııa júrgizer aldynda dene temperatýrasyn ólsheý, epıdemıologııalyq anamnezdi jınaý, satýrasııany, júrek jıyrylýynyń jıiligin, arterııalyq qysymdy ólsheý, tynys alý jáne júrek-qantamyr júıesin aýskýltasııalaý jáne jutqynshaqty tekserý arqyly dáriger mindetti túrde tekserý júrgizedi. Eger temperatýra 37°C-tan joǵary bolsa, vaksınasııa keıinge qaldyrylady. Egiletin adam egýdi júrgizý aldynda 2018 jylǵy 13 maýsymdaǵy № 361 Sanıtarııalyq qaǵıdalarǵa sáıkes nysan boıynsha erikti túrde jazbasha aqparattandyrylǵan kelisimge nemese profılaktıkalyq egýdi júrgizýden bas tartýǵa qol qoıady», dedi M. Shoranov.
Birinshi kezeńde Qazaqstanda «Spýtnık V» vaksınasy qoldanylady. Aqpan aıynyń basynda – 20 myń dozaǵa deıingi kólemde reseı óndirisiniń «Gam-Kovıd-VAK» (Spýtnık V) birinshi partııasy ákelinedi dep kútilýde, QR aýmaǵyna bir jolǵy ákelý jolymen osy partııany jetkizýge Reseı tarapymen tıisti kelissiózder bar.
15 aqpannan bastap Qaraǵandy farmasevtıkalyq kesheni óndirisiniń «Spýtnık V» vaksınasy tirkeletin bolady.
«Qazirdiń ózinde 90 myń doza kóleminde birinshi partııanyń óndirisi bastaldy, ol 26 aqpannan bastap Biryńǵaı dıstrıbıýtordyń qoımalaryna jáne odan ári óńirlerge jóneltiletin bolady. Keıinnen shilde aıyna deıin óndiris kólemi 2 mln dozaǵa deıin jetkiziletin bolady. Aldyn ala derekter boıynsha atalǵan vaksınanyń tıimdiligi shamamen 92%-dy quraıdy», dedi Birinshi vıse-mınıstr.
Otandyq «KazKOVID-ın»-i birinshi kezeńde shamamen 2 mln doza kóleminde kútilýde. COVID-19 qarsy belsendiligi joıylǵan otandyq QAZCOVID-IN vaksınasynyń ázirleýshileri QR BǴM «Bıologııalyq qaýipsizdik problemalary ǵylymı-zertteý ınstıtýty».
Vaksınada belsendiligi joıylǵan vırýs jáne zııansyz adıývant negizge alynǵan, bul tehnologııa ýaqytpen tekserilgen jáne A gepatıtine, menıngokokk ınfeksııasyna, tumaýǵa, ish súzegine, kene ensefalıtine jáne t. b. ınfeksııalarǵa qarsy burynnan qoldanylǵan vaksınalardy óndirýde paıdalanylady.
QazCovid-in vaksınasyn COVID-19-ǵa qarsy klınıkalyq zertteýdiń I jáne II fazalarynyń nátıjeleri boıynsha jaqsy tózimdilik pen qaýipsizdik baıqaldy. Birli-jarym jaǵdaılarda vaksına engizilgen jerde qyzarý, azdap ashytý, shanshý baıqaldy, bul organızmniń ımmýndyq júıesiniń engizilgen vaksınaǵa reaksııasy bolyp tabylady. Bul belgiler zertteý hattamasynda kútiletin qubylys retinde qarastyrylǵan.
Bıyl 11 qańtar kúni eriktilerdi jınaý aıaqtaldy jáne 3000 adam egildi. Qazirgi ýaqytta zertteýge qatysýshylarǵa dınamıkalyq baqylaý júrgizilýde.
Zertteýdiń barlyq sýbektilerine salyqtardy shegergende 200 myń teńge mólsherinde syıaqy jáne zertteletin vaksınany qoldaný saldarynan zertteý sýbektisiniń densaýlyǵyna zııan keltirilgen jaǵdaıda densaýlyqty saqtandyrý kózdelgen.
Zertteýler aıaqtalmaǵanyna jáne aqparattyń qupııalylyǵyna baılanysty zertteý nátıjelerin ázirleýshiler zertteý aıaqtalǵannan keıin usynady,-dedi M.Shoranov.
Vaksınasııadan qorǵanysh áseri birinshi dozany engizgennen keıin 12 kúnnen keıin biline bastaıdy, biraq tolyq ımmýnıtet qalyptastyrý úshin eki doza qajet, olardy 19 kúnnen 23 kúnge deıingi aralyqpen engizý usynylady. Vaksına organızmniń ımmýndyq reaksııasyn týdyrady.
«Immýndyq júıe vırýsty tanıdy antıdeneler paıda bola bastaıdy – aýrýmen kúresý úshin paıda bolatyn aqýyzdar, vırýsty este saqtaıdy jáne eger vırýs qaıtadan denege ense, onda ımmýndyq júıe dereý áreket etedi de ony joıady, onyń kóbeıýine jáne aýrýdyń týdyrýyna jol bermeıdi»,-dedi M.Shoranov.
Búginde KVI-ǵa qarsy vaksınasııaǵa daıyndyq boıynsha sharalar qabyldanýda. Egý pýnktteriniń daıyndyǵyn tekserý júrgizilýde. Densaýlyq saqtaýdyń barlyq deńgeılerinde (muzdatqyshtar, termokonteınerler satyp alý) salqyn tizbek jaǵdaılaryn qamtamasyz etý boıynsha sharalar qabyldanýda. Profılaktıkalyq egýlerdi júrgizý, vaksınany tasymaldaý jáne saqtaý kezinde salqyn tizbek sharttaryn saqtaý máseleleri boıynsha standartty operasııalyq emsharalar bekitildi.
KVI-ǵa qarsy vaksınasııa tásili jáne vaksınasııanyń qaýipsizdigi men tıimdiligin qamtamasyz etý boıynsha 2 myńnan astam medısına qyzmetkeri oqytyldy. Kaskadty oqytý jalǵasady jáne ony 2021 jylǵy 28 qańtarǵa deıin aıaqtaý josparlanyp otyr.
Memleket basshysynyń ımmýndyq mártebe týraly aqparaty bar QR – kodty engizý máselesin pysyqtaý jónindegi tapsyrmasyn oryndaý sheńberinde jáne júıelendirilgen esepke alý maqsatynda vaksınasııalaýdyń elektrondyq pasporty ázirlendi. Vaksınasııa júrgizý týraly derekter Mınıstrliktiń ortalyqtandyrylǵan aqparattyq júıesinde elektrondyq formatta júrgiziletin bolady. Bul vaksınalanǵan adamdardyń sanyn esepke alýǵa jáne vaksınasııa kólemin josparlaý jáne syrqattanýshylyqty boljaý úshin bolashaqta halyqtyń ımmýndyq mártebesin qadaǵalaýǵa múmkindik beredi. Veb-qosymshada pasıent pen medısına qyzmetkeriniń m-gov mobıldi qosymshasynda aqparatty qolmen engizýge bolady.
«Chıpteý» týraly suraqtardyń qoıylatynyn aldyn ala bile otyryp, bul osyndaı feıkti jarııalaıtyn vaksınasııalaýǵa qarsylastardyń negizsiz málimdemesi ekenin atap aıtamyn. Sondaı-aq, qazirdiń ózinde vaksınasııa bastalǵanǵa deıin vaksınasııadan keıingi qolaısyz kórinister týraly jalǵan aqparat taratylyp júr, sondyqtan, jalǵan aqparat taratqany úshin qylmystyq jaýapkershilik (3000 AEK-ten 3 jylǵa deıin bas bostandyǵynan aıyrý) kózdelgenin eske salǵym keledi, dedi Birinshi vıse-mınıstr.
- BAQ jáne áleýmettik jeliler arqyly halyqpen aqparattyq-túsindirý jumystaryn júrgizý óte mańyzdy. Vaksınasııa rásimderi men jıi qoıylatyn suraqtarǵa jaýaptary kórsetilgen ınfografıkalar men úlestirme materıaldar ázirlendi. Densaýlyq saqtaý mınıstrliginiń 1406 biryńǵaı koll ortalyǵy jáne óńirlerdegi MSAK uıymdarynyń koll ortalyqtary KVI-ǵa qarsy vaksınasııa júrgizý rásimderi boıynsha suraqtarǵa jaýap berýge daıyn bolady. Sonymen qatar, vaksınaǵa qatysty negizsiz dúrlikpeı, shydamdylyq pen túsinistik tanytýdy suraımyn, - dedi ol.
