Shoqtyǵy bıik sóz sańlaqlaqtarynyń qanshama býynyn qalyptastyrǵan qarashańyraqtaǵy Baspagerlik-redaktorlyq jáne dızaınerlik óner kafedrasynyń uıytqy bolýymen ótken konferensııada qazaq jýrnalıstıkasynyń ótkeni men bolashaǵy týraly mazmundy oılar aıtylyp, ádebı prosess pen jazý óneriniń búgingi órisi keńinen saralandy. Stýdenttik shaǵynda ádebı ortaǵa «Qaraózek» romanymen tanylǵan Nurjan Qýantaıuly búginde proza, poezııa janrynda qatar qalam terbeı otyryp, tájirıbeli ustaz retinde bolashaq baspagerlerdi daıyndaýǵa aıryqsha úles qosyp keledi. Qazaqstan Jastar Odaǵy syılyǵynyń, «Ádebıet» atalymy boıynsha «Daryn» memlekettik syılyǵynyń, Halyqaralyq «Alash» ádebı syılyǵynyń laýreaty atanǵan qabyrǵaly qalamger ádebıetten bólek ulttyq jýrnalıstıkanyń órkendeýine de eńbek sińirip júrgen maıtalman maman.
«Nurjan Qýantaıuly ádebıet álemine óziniń qoltańbasymen, ózindik únimen kelgen aqyn. Sonaý 90 jyldardyń ózinde ol jarq ete qalyp, búkil ádebıet súıer qaýymdy eleń etkizgen bolatyn. Nurjannyń shyǵarmashylyq qýaty keń. Ádebıet pen ǵylymdy egiz órgen ustazdan tálim alǵan shákirtter qazaq sóz óneriniń qadir-qasıetin tereńnen zerdeleri haq», deıdi synshy, halyqaralyq «Alash» ádebı syılyǵynyń laýreaty Amangeldi Keńshilikuly.
Qalamgerdiń mereıtoıyna oraı, Qazaqstan Respýblıkasynyń Memlekettik hatshysy Qyrymbek Kósherbaev quttyqtaý hat joldady. Sondaı-aq, ýnıversıtet basshylyǵy Nurjan Qýantaıulyn «Eren eńbegi úshin» medalimen nagradtap, shyǵarmashylyq tabys tiledi.
Nurjan Qýantaıulynyń «Qaraózek» romany (2001), «Adyrna» (1993), «Kúmbir» (2005) atty jyr jınaqtary, «Alash-Orda baspasózi jáne Júsipbek Aımaýytuly», ««Júsipbek Aımaýytulynyń kósemsózi» atty monografııalary (2012), «Qolshatyr» (2013), «Asyl sóz» (2015), «Beıýaq» (2019) atty prozalyq jınaqtary t.b. kitaptary jaryq kórgen. Aqynnyń tańdaýly jyrlary «Jyr marjany» atty on tomdyq qazaq poezııasynyń antologııasyna (2015) engizilgen. Shyǵarmalary túrik, orys, qytaı, ózbek, qyrǵyz tilderine aýdarylǵan.
ALMATY
