Aqtaý qalasynyń tergeý ızolıatorynda sottalǵandarǵa óz ónerin shyńdap, ǵylymı jumyspen aınalysyp, ózine de, qoǵamǵa da paıdasy zor eńbekpen shuǵyldaný jolǵa qoıylǵan. Jýyrda sottalǵandar arasynda uıymdastyrylǵan qolóner buıymdarynyń kórmesi – osynyń dáleli.
Is-sharanyń negizgi maqsaty – jazasyn óteýshilerdiń bos ýaqyttaryn tıimdi paıdalaný, shyǵarmashylyq sheberligin shyńdap, ómir jaıly oı-tolǵamdaryn, qorshaǵan ortaǵa degen kózqarastaryn bildiretin shyǵarmalarmen bólisý. Kórmege qoıylǵan qolóner buıymdaryna mekeme qyzmetkerlerinen jasaqtalǵan qazylar alqasy baǵa berdi.
Sottalǵandar daıyndaǵan týyndylarda oqshaýlaý jaǵdaıyndaǵy ómir ǵana emes, sondaı-aq qazirgi sátte olardan alys qalǵan tabıǵat sulýlyǵy, otbasylyq ómirdiń qyzyǵy, jylylyq pen arman-múddeleri kórinis tapqan.
Atap aıtqanda, Q.Uzaquly óz qolymen toqyǵan jún shulyǵyn kórmege usynsa, al N.Halıkov qaǵazdan jasaǵan taýysty, N.Sadabaev aǵashtan oıyp jasaǵan qobdıshasyn, B.Donbaev plastmassa shólmeginen jasalǵan táspi usyndy. Qolóner buıymdarynyń kórmesine jalpy sany 5 týyndy usynyldy.
Saıysqa qatysýshylar qolóner buıymdaryn qazylar alqasyna keńinen tanystyryp, buıymdardyń mán-maǵynasyn ashyp berdi. Qazylar sottalǵandardyń áńgimelerin tyńdap, erekshe kózge túsken buıymdardyń ıelerin jeńimpaz dep tanyp, olardy mekeme bastyǵynyń gramotasymen marapattady. Qolóner buıymdary avtorlarynyń usynysy boıynsha kórmege usynylǵan buıymdar Aqtaýdaǵy balalar úıine tabys etildi.
Osylaısha, jazasyn óteýshi jandar qamkóńil balalarǵa qýanysh syılady.
Mańǵystaý oblysy
