Kollajdy jasaǵan Záýresh SMǴUL, «EQ»
Almatyda pandemııa bastalǵaly beri 21 547 KVI jaǵdaıy tirkelse, tek sársenbi kúni indetke shaldyqqandarǵa 139 naýqas qosyldy. Aýrýdan saýyqqandar sany qazirgi ýaqytta – 19 487 adam, bul juqtyrǵan barlyq jaǵdaılardyń 91%-yn quraıdy.
Degenmen, koronavırýspen kúresýge baǵyttalǵan áreketter aýrý órship turǵanyna qaramastan, óz nátıjesin berip otyr. Infeksııalyq stasıonarlardyń júktemesi turaqty, búginde 724 tósektik oryn bos emes, bul rette onyń 61%-y bos jáne 5 145 tósektik oryn rezervte tur. Qazirgi ýaqytta táýligine orta eseppen 50-90 pasıent emdeýge jatqyzylady. Jansaqtaý bólimsheleri 50% bos emes. Bastapqyda reanımasııalyq tósektik oryndar sany 80 bolsa, tósektik oryndar sanyn 120-ǵa deıin ulǵaıtýǵa týra keldi.
KVI juqtyrǵandardyń arasynda qatar júretin aýrýlary bar naýqastar sany aıtarlyqtaı óskenin aıta ketken jón. Sondyqtan qala turǵyndaryna úıden sırek shyǵý, adamdar kóp jınalatyn oryndarǵa barmaý, ózin-ózi emdeýmen aınalyspaý, bilikti medısınalyq kómekke júginý tynbaı eskertilip otyr.
Sonymen qatar medısınalyq-sanıtarlyq alǵashqy kómek uıymdarynda COVID-19-ben kúresý úshin úıde emdelip jatqan pasıentterge monıtorıng júrgizetin mobıldi brıgadalar quryldy. Búgingi tańda úıde medısınalyq baqylaýda 797 adam tur.
Byltyr qyrkúıekte COVID-19 vırýsyn juqtyrǵan pasıentterdi emdeý boıynsha MSAK uıymdaryn qoldaý maqsatynda qaýipti toptardaǵy karantındik pasıentterdi qashyqtyqtan baqylaý jáne konsýltasııalar júrgizý úshin Telemedısına ortalyǵy qurylǵan bolatyn. Qarashadan bastap búginge deıin ortalyq mamandary12 myńnan astam kiris qońyraýyn qabyldap, 51 myńnan astam shyǵys qońyraýy jasaldy.
Árıne, jurttyń barlyǵyn 1 aqpannan bastap júrgiziletin vaksınalaý máselesi tolǵandyrady. Qalalyq densaýlyq saqtaý basqarmasy Spýtnık-V vaksınasynyń túsýin kútip otyr. Qańtar aıynyń sońynda Almatyǵa vaksınanyń 1 450 dozasy (290 quty) kelip túsedi. Vaksınalaý júrgiziletin emhanalarda saqtaýǵa arnalǵan tońazytqysh jabdyqtar men qoımadan vaksınalaý kabınetine deıin tasymaldaýǵa arnalǵan tońazytý elementteri bar konteınerler satyp alyndy. Aqpan aıyna 6 myń doza jáne shilde aıyna deıin 150 myń doza alý josparlanyp otyr.
Eriktilerge salynǵan qazaqstandyq vaksına klınıkalyq synaqtardyń sońǵy satysynan ótýde jáne maquldanǵan jaǵdaıda halyqty ımmýndaý úshin de kelip túsedi.
ALMATY
