Jańa jylǵa deıin jaımashýaq edi. Qatal qys minezin qańtar aýa tanytty. Keıbir táýlikterde synap baǵanasy 42 gradýsqa deıin jetti. Bet qaratpaıtyn, atan túıeni alyp jyǵatyn boran da soqty. Aıazdan buryn aq qardyń ádettegiden mol túsýi kıikter úshin qolaısyz boldy. Oblystyq orman sharýashylyǵy jáne janýarlar álemi aýmaqtyq ınspeksııasynyń basshysy Lashyntaı Dúısenovtiń aıtýyna qaraǵanda, kıik ataýly qary az, qysy jumsaq ońtústikke aýmaı, soltústikte qystap qalǵan. Deni – Qorǵaljyn, Egindikól, Jaqsy, Atbasar aýdandarynda.
Qalyń qar tebinge múmkindik bermeı tur. Sonyń saldarynan kıik shyǵyny da oryn alýda. Ile shara qoldanbasa, tigerge tuıaq qalmaýy da ábden múmkin. Kıeli janýarlardy saqtap qalý úshin aýdandaǵy sharýashylyqtar arnaıy tehnıka bólip, kıik jaıylymdaryn qardan tazalaýǵa kirisken.
– Byltyr jeltoqsan aıynyń basynda «Qorǵaljyn» memlekettik tabıǵı qoryǵynyń aýmaǵynda 25 myńǵa jýyq kıik bar edi. Qazir barlyq kardondarda qoryqshylar sanyn kóbeıttik. Jedel jolǵa shyǵý úshin janar-jaǵar maı qoryn jasadyq. Qar tazalaǵyshtyń kómegimen jaıylymdardy arshyp jatyrmyz, – deıdi qoryq dırektory Asqar Seksenbıev.
Aýmaqtyq ınspeksııa basshysy Lashyntaı Dúısenov qalyptasyp otyrǵan barlyq jaǵdaıdy táptishtep baıandap, oblys basshylyǵyna hat jazyp, kómek suraǵan. Janýarlarǵa janashyr kózqarastyń nátıjesinde, shuǵyl sharalar qolǵa alyndy. 2008 jyly elimizde uzyn-yrǵasy 60 myńǵa jeter-jetpes bolyp qana qalǵan, memleketimizdiń erekshe qamqorlyǵyna alynǵan ári halyqaralyq Qyzyl kitapqa engizilgen kıikterdi qorǵaýǵa jergilikti atqarýshy organdardyń qamqorlyq tanytýy ábden jón. Saıyn dalanyń sánin keltiretin kıikti qorǵaý – barshaǵa mindet.
Aqmola oblysy
