Ǵalymdar, eń aldymen, vırýs taraǵan teńiz ónimderin satatyn Hýanan bazarynan bastaıdy. Byltyr jyl basynda jabylǵan bazar jumysy áli de toqtap tur. Arnaıy qorshaýlardan bólek, halyq kirip ketpesin dep 24 saǵat kúzet qoıylǵan. Jabylǵanǵa deıin et, teńiz ónimderi men kókónister satatyn júzdegen dúńgirshek ornalasqan bul bazardan adam úzilmeıtin. Dese de keıbir qytaı dıplomaty men jergilikti BAQ indettiń oshaǵy dál osy jer degen pikirge qarsy shyǵyp, vırýs ózge elden keldi degen pikirdi qoldaǵan. 2019 jyldyń 31 jeltoqsanynda osy bazarǵa baılanysy bar tórt adamnyń belgisiz pnevmonııa juqtyrǵany belgili. Nátıjesinde, ádette tirshiligi qaınap jatatyn saýda orny bir túnde jabylady. Keıinnen qańtardyń aıaǵynda Ýhan qalasy 76 kúndik qatań karantınge jabylǵan-dy.
Sarapshylar álemdegi indettiń alǵashqy belgileri osy jerden bastalǵandyqtan, Hýanan bazary vırýsty zertteýde úlken ról atqaratynyn aıtyp otyr. Qytaıǵa kelgen mamandar eki aptalyq karantınnen keıin Ýhandaǵy zerthanalar, bazarlar men aýrýhanalarǵa barady. Osyǵan deıin AQSh tarapynan Qytaıdyń keıbir derekterdi jasyryp, indetke qatysty aqparatty burmalaýyna baılanysty kóp syn taǵylǵan edi. Zertteý oqıǵanyń aq-qarasyn ajyratýǵa tıis.
