Áýesqoı ónertapqysh tól tehnıkasyn jazda baqsha jumystaryna, qysta qoradaǵy malǵa shóp tasý, qı shyǵarý, aýlanyń qaryn kúreý sııaqty úı sharýasyna paıdalanady.
– Áýeli ınternetti aqtaryp otyryp, qoldan qurastyrylǵan tehnıkalar týraly kóptegen beınematerıaldardy súzip shyqtym, neshe túrli forýmdarǵa qatystym. Odan keıin traktor eskızderiniń birneshe úlgisin jasap kórdim. Aqyry bireýine toqtap, qurastyrý jumystaryn bastadym. Basynda qıyn boldy, bir bólshekti ornatyp bitken soń, oǵan ekinshisi sáıkes kelmeı qalady. Ony qaıtadan sheship, keıbireýin ózgertińkirep, qyryp, jonyp, qıyp, qaıta kıgizýge týra keldi, – deıdi ónertapqysh.
Traktor qýaty 15 attyń kúshine teń shaǵyn ǵana benzın qozǵaltqyshymen qozǵalady. Jyldamdyq aýystyrǵysh qoraby 412-nshi «Moskvıchten», al rýldi basqarý beldemesi «Volkswagen Golf II» kóliginen alynypty. Shaǵyn traktordyń aldyńǵy dońǵalaǵy – jeńil kóliktiki, al artynda bıdaı sebetin arnaıy tehnıkanyń eski dońǵalaǵy tur.
Úı sharýasyna qolaıly ámbebap tehnıkanyń farkopy, oǵan tirkeıtin arbasy da bar. Onymen 800 kıloǵa deıin júk tasýǵa bolady. Qajet bolǵan jaǵdaıda arbany sheship, onyń ornyna kúrek tirkeledi. Bul jaǵdaıda traktor shaǵyn býldozerdiń sharýasyn atqarady. Tirkeme kúrek qı kúreýge nemese qar tazalaýǵa yńǵaıly. Aleksandr traktoryn kóktemde jer jyrtyp, topyraq qopsytýǵa da paıdalanady.
Aýyl turmysyna qolaıly ámbebap traktordyń bágine 7 lıtr janarmaı syıady, biraq osynyń ózi traktordy birneshe saǵat boıy toqtaýsyz jumysqa jegýge jetip jatyr. О́nertapqysh tehnıkasyn qurastyryp shyqqansha, satyp alǵan bólshekteri, temir jonýshynyń eńbekaqysy bar – barlyǵy 700 myń teńge shyǵyndapty.
Qostanaı oblysy
