Búgingi kúnde «El gazeti» degen sóz tirkesi mindetti túrde qosaqtalyp aıtylatyn basylymmen tanystyǵym bala kezimnen bastalǵan edi. Marqum ákem Qomar burynǵy «Sosıalıstik Qazaqstan», qazirgi «Egemen Qazaqstan» gazetin etekteı qylyp jaıyp tastap, shuqshııa oqyp jatýshy edi. Ákemniń osy aıaýly da ystyq beınesi sanamda máńgi saqtalyp qaldy. El gazetine degen erekshe qurmettiń qalyptasýyna jadyda jattalyp qalǵan sol sýrettiń de úlken septigi tıdi-aý degen oı jıi keledi búginde...
Álbette, ǵasyr jasaǵan gazettiń zamana tamyryn tap basqan búgingi bet-beınesi, mán-mazmuny qatty ózgergen. Shyntýaıtyna kelgende, basylym qazir óziniń órkendeý dáýirin bastan keship jatyr dep batyl túrde aıtýǵa bolady. Onyń árbir betinen búgingi kúnniń mańyzdy hám ózekti degen taqyryptary bar boıaý-bolmysymen jarqyraı kórinis taýyp keledi. Eldegi oqıǵalar óz aldyna, gazet álemdik keńistikke erkin qanat qaǵyp, halyqaralyq deńgeıde dáreje bıigine kóterile bastady.
О́zim eki jyldan beri BAQ, bilim, mádenıet jáne óner salasynyń qyzmetkerlerine arnalǵan «Tulǵa» syılyǵyn taǵaıyndap, osy jobany júzege asyryp kelemin. Aıtaıyn degenim, atalǵan syılyq aıasynda aqparat salasynyń úzdikterine beriletin bas júlde «Egemen Qazaqstan» gazetiniń atyn ıemdengen. Muny men halqyna qaltqysyz qyzmet etip kele jatqan baıyrǵy basylymǵa degen ózimniń qurmetim dep sanaımyn.
Búgin osy ordaly basylymnyń otyz myńynshy sany jaryqqa shyqqan eken. Olaı bolsa, jańashyldyqtyń jarshysy, kemel oıdyń kenishi, aqıqattyń aldaspany dep irkilmeı sıpattaýǵa turatyn iri gazettiń tarıhty tańbalaǵan taǵy bir qadamyna qutty bolsyn aıta otyryp, «Egemenim» elmen birge jasasyn!» degen tilekti shyn júrekten jetkizgim keledi.
Bekzat ALTYNBEKOV,
mesenat, Qaraǵandy oblystyq
Qoǵamdyq kelisim keńesiniń tóraǵasy,
oblystyq máslıhattyń depýtaty
Jezqazǵan qalasy
