Vaksına eń aldymen koronavırýs juqtyrǵan adamdarmen tikeleı baılanysta bolatyn medısına qyzmetkerlerine egiletin bolady. Olardyń qatarynda ınfeksıonıst dárigerler, reanımatologtar, qabyldaý bólimi men jedel járdem, sanıtarlyq-epıdemıologııalyq qyzmet mamandary bar.
Búgin tańerteń Tarazdaǵy №4 qalalyq emhanaǵa alǵashqy 50 doza kelip tústi. Vaksınasııa tek erikti túrde júrgiziletinin atap ótken jón. Vaksınany alǵashqylardyń biri bolyp oblys ákiminiń orynbasary Berik Nyǵmashev pen densaýlyq saqtaý basqarmasynyń basshysy Áset Qalıev qabyldady.
«Prosedýra aýyrsynýsyz ótti, ózimdi jaqsy sezinemin. Biz ujymdyq ımmýnıtetti qalyptastyrý úshin vaksınasııalaýdan bas tartpaýymyz kerek. Ekonomıkanyń damýy jáne turǵyndardyń qalypty tirshilikke tezirek oralýy úshin joldaǵy kedergilerdi eńserý kerekpiz», dedi Berik Nyǵmashev.
Al Áset Qalıevtiń aıtýynsha, 18-64 jas aralyǵyndaǵy oblys halqynyń 52 paıyzyn vaksınasııalaý josparlanýda.
