Tarıh jáne shetel tilderi ınstıtýtynyń qoldaýymen ótetin dástúrli bilim dodasy bıyl da uıymdastyrylyp, óz máresine jetti.
«Rýhanı jańǵyrý» baǵdarlamasy aıasyndaǵy olımpıadaǵa Túrkistan, Qyzylorda, Almaty oblystary men Shymkent jáne Almaty qalalaryndaǵy mektepterdiń oqýshylary qatysyp, baqtary men baptaryn synasty.
Saıystyń birneshe kezeńnen turatyn irikteýinen ótken 8 komanda aqtyq márede óz bilimderin pash etip, 5 aınalym boıynsha tapsyrmalardy oryndady. Atap aıtqanda, bilim alýshylar «Tanystyrý», «Tarıhı hronologııa», «Uly dalanyń qaharman qyzdary», «Tarıhı termınologııa» jáne «Oı tolǵaý» týrlary boıynsha ózara myqtyny anyqtady.
Alǵashqy kezeńde ár komanda óziniń ýnıversıteti men múshelerin tanystyryp, komandanyń atyn qorǵady.
«Tarıhı hronologııa» atty ekinshi aınalymda ár komanda uıashyqtardyń artynda jasyrylǵan tarıhı datalardyń maǵynasyn durys ashýy tıis. Bul sandar Uly dalanyń uly qyzdarynyń ómiri men qoǵamdyq-saıası qyzmetimen baılanysty. Komandalar durys jaýap bergenine qaraı upaı enshileıdi.
Úshinshi týrda qatysýshylarǵa «Uly dalanyń qaharman qyzdary» taqyrybyndaǵy arnaıy beınetaspaǵa túsirilgen saýaldar qoıyldy.
«Tarıhı termınologııa» atty tórtinshi aınalymnyń sharty boıynsha ár komanda tarıhı termınderge 3 deńgeı negizinde anyqtama berýi tıis. 1-deńgeı «qola qaqpa», 2-deńgeı «kúmis qaqpa» jáne 3-deńgeı «altyn qaqpa» dep atalady. Tolyq jaýap bergen komanda ǵana úsh qaqpany ashqan bolyp, tolyq baǵalanady. Úshinshi qaqpanyń suraǵy aǵylshyn tilinde qoıylady, sáıkesinshe komandalar suraqtarǵa aǵylshyn tilinde jaýap beredi.
Sońǵy kezeń «Oı tolǵaý» dep atalady. Bul aınalymdael tarıhyndaǵy esimderi ulyqtalǵan uly qyzdar týraly esse suraqtar jerebe negizinde ár komanda jetekshisine úlestiriledi. Shart boıynsha saıysker tapsyrmany oryndaýǵa beriletin 10 mınýtta 100 sózden kem emes esse jazýy tıis.
– Respýblıkanyń ár aımaǵynan jınalyp, bir arnada bas qosqan bilimpaz jastar qoıylǵan saýaldarǵa jaýap berip, berilgen tapsyrmalardy oryndaý barysynda oılaryn jan-jaqty tujyrymdaı bildi. Tarıh páninen alǵan tanym deńgeılerin aıqyn kórsetti. Qazylar alqasy árbir toptyń jaýaptaryna qatysty óz usynystary men pikirlerin bildirip, tıisti baǵalaryn berdi, deıdi qazylar alqasynyń múshesi, tarıh ǵylymdarynyń kandıdaty Erdáýlet Berlibaev.
Olımpıada qorytyndysy boıynsha birinshi orynǵa Almaty oblystyq №15 mektep-ınternatynyń oqýshylarynan quralǵan «Qaısar qyzdar» toby laıyq dep tanyldy. Ekinshi oryndy Qyzylorda oblysynyń Syrdarııa aýdanyndaǵy №37 mektep-lıseıiniń «Tumar» toby men Shymkent qalasyndaǵy №90 gımnazııasy ıelense, úshinshi oryndy Almaty oblysynyń Qaskeleń qalasyndaǵy Abaı atyndaǵy orta mektep-gımnazııasynyń «Hansulý» jáne Almaty qalasyndaǵy №15 gımnazııasynyń «Qaǵanat» komandalary ózara bólisti.
Jeńimpazdar men júldegerler Alǵys hattarmen jáne dıplomdarmen marapattaldy.
