Onyń aıtýynsha, Memleket Basshysy Qasym-Jomart Toqaevtyń tapsyrmasy aıasynda ázirlenip jatqan «Jasyl Qazaqstan» ulttyq jobasyn iske asyrý aýanyń lastaný deńgeıi joǵary 10 qaladaǵy jaǵdaıdy jaqsartýǵa múmkindik beredi.
«Jasyl Qazaqstan» ulttyq jobasy 7 negizgi bólimnen turady: sý nysandaryn saýyqtyrý, aýanyń lastaný deńgeıin tómendetý, qaldyqtardy basqarý, bıoalýantúrlilikti saqtaý, eldi kógaldandyrý, energııa tıimdiligi, ekoqurylym jáne ekologııalyq mádenıetti arttyrý. Bul Temirtaý, Nur-Sultan, Almaty, Aqtóbe, Atyraý, О́skemen, Qaraǵandy, Balqash, Jezqazǵan jáne Shymkent qalalarynda ekologııalyq jaǵdaıdy jaqsartýǵa yqpal etedi», dep habarlady mınıstr.
Vedomstvo basshysy atap ótkendeı, 2025 jylǵa qaraı aǵyn sýlardy tógý kólemin tómendetýge qol jetkizý, qaldyqtardy óńdeý úlesin 18% - dan 35%-ǵa deıin arttyrý, sondaı-aq eldiń JIО́ energııa syıymdylyǵyn tómendetý josparlanýda.
«Orman qorynda 2 mlrd. aǵash otyrǵyzý boıynsha júrgizilip jatqan jumystardyń tıimdiligine qoǵamdyq monıtorıng júrgizý úshin Ekologııa mınıstrliginiń qoldanystaǵy geoportalynyń bazasynda ınteraktıvti kartany qurý usynylady. Qazir osy geoportalda orman órtteri men zańsyz aǵash kesý monıtorıngi onlaın rejımde júrgizilýde», dep atap ótti Maǵzum Myrzaǵalıev.
Ekinshi ulttyq joba úshin buryn ázirlengen sý resýrstaryn basqarý jónindegi memlekettik baǵdarlamanyń jobasyn qaıta qurý josparlanýda.
«Biz sý resýrstaryn basqarý jónindegi memlekettik baǵdarlamanyń jobasyn ázirledik. Búginde atalǵan memlekettik baǵdarlamany ulttyq jobaǵa aınaldyrý jumystary júrgizilýde. Sý dıplomatııasyn nyǵaıtý úshin memleketaralyq sý qatynastaryn jetildirýdi, sıfrlandyrýdy, sý resýrstaryn esepke alý men monıtorıngileýdi, sý únemdeýdi, ırrıgasııalyq júıeler men qurylystardy qalpyna keltirýdi qamtıtyn 6 negizgi baǵyt aıqyndaldy», - dep habarlady mınıstr. Atalǵan tarmaqtardan basqa, quqyqtyq bazany jańartý, jańa redaksııadaǵy Sý kodeksin ázirleý, sondaı-aq sý salasynyń mamandaryn daıarlaý jónindegi jumysty kúsheıtý josparlanýda.
«Nátıjesinde 119 arnany sıfrlandyrý jumystary júrgizilip, ózen aǵysynyń resýrstaryn anyqtaıtyn aqparattyq júıe qurylady. Budan basqa, qazirgi zamanǵy sý únemdeý tehnologııalaryn qoldana otyryp, sýarmaly jerlerdiń alańy 221 myń gektardan 420 myń gektarǵa deıin ulǵaıtylatyn bolady», - dep aıta ketti Maǵzum Myrzaǵalıev.
Budan basqa, ulttyq joba aıasynda 2 myń km-ge jýyq magıstraldyq arnalardy qaıta jańartý, jalpy kólemi 885 mln.m3 bolatyn 8 jańa sý qoımasyn salý josparlanýda.
«Jańa sý qoımalary Jambyl, Batys Qazaqstan, Túrkistan, Almaty jáne Qyzylorda oblystarynda salynady. 2025-2030 jyldar aralyǵynda taǵy 31 jańa sý qoımasy salynady», dep túıindedi mınıstr.
Ulttyq jobalardy ázirleý boıynsha jumysty bıylǵy jyldyń 1 shildesinde aıaqtaý josparlanyp otyr.
