«Ekinshi deńgeıli turǵyn úılerdiń naryǵy týraly suraqqa keler bolsaq, baspana baǵasy árıne, satýshynyń naryǵyna táýeldi. Baspana máselesi qoǵamda birinshi kezekke shyqqannan keıin árıne, úı satatyn adamdar molyraq paıdaǵa kenelip qalǵysy keledi. Meniń oıymsha, azdap kúte turý kerek. Ýaqyt óte kele naryq óziniń shynaıy qalpyna oralady. Suranys pen usynystar ol úshin teńesýi kerek. Menińshe, osy jyldyń mamyry men maýsymy aralyǵynda baǵa máselesi ótken jylǵa uqsas kezeńge oralýǵa tıis», dedi Lázzat Ibragımova OKQ-da ótip jatqan baspasóz máslıhatynda.
Ol sonymen qatar, zeınetaqy jınaǵynyń bir bóligine 45 kúnniń ishinde úı taba almaı qalatyn azamattardy sabyr saqtaýǵa shaqyrdy.
«Mundaı jaǵdaıda 45 kúnnnen keıin qarajat jeke zeınetaqy qoryna qaıtarylady. Ol úshin ýaıymdaýdyń qajeti joq. Odan keıin de qaıta ótinim jiberýge ábden bolady», dedi ol.
Eske salsaq, jaqynda ótken Úkimet otyrysynda Prezıdent Qasym-Jomart Toqaev baspana baǵasynyń sharyqtaýyna tosqaýyl qoıýdy tapsyrǵan bolatyn. 2021 jyly 2 qańtarda QR Prezıdenti Qasym-Jomart Toqaev zeınetaqy jınaǵynyń bir bóligin maqsatty paıdalanýǵa qatysty zańǵa qol qoıdy. Qazaqstandyqtardyń zeınetaqy jınaqtaryn paıdalaný úshin jańartylǵan «jetkiliktilik shegi» jarııalandy.
Zeınetaqy jınaǵynan alýǵa bolatyn soma BJZQ saıtynda avtomatty túrde kórsetiledi. 23 qańtardan Qazaqstanda zeınetaqynyń bir bóligin alýǵa ótinim qabyldaý bastaldy. Arnaıy portalda zeınetaqynyń bir bóligin alýǵa ótinim qabyldaý bastalǵaly úsh saǵattyń ishinde 4 myńnan astam adam ótinish berdi.
