Bereldegi qazba jumystary kezinde qıma taǵannyń ishine qoıylǵan astaý tabyttan áıeldiń múrdesimen birge ábzeldengen eki jylqy shyqqan-dy. Oba birneshe ret tonalǵanymen, bas kıimniń áshekeıleri saqtalǵan. Buıymdardyń ishinde aǵashtan oıylyp, altyn jalatylǵan taý eshkilerdiń músinderi, jyrtqysh qus stılindegi oıý-órnekter men fantastıkalyq polımorfty qanatty tirshilik ıeleri, túrli órnekti plastınalar men japsyrmalar bar. Buǵylardyń baryspen aıqasqa túsken kórinisteri beınelengen úlken tikburyshty plastınalar da erekshe kózge túsedi.
Sondaı-aq belgili arheolog Zeınolla Samashevtyń jetekshiligimen júrgizilgen bul qazba jumystarynda altynmen qaptalǵan pyshaq, qysh qumyranyń synyqtary kezdesken.
Arheolog ǵalymdar aıtqandaı, tabylǵan jádigerler b.z. d. IV ǵ. sońy men III ǵ. basynda ómir súrgen aqsúıek saq áıeliniń beınesin qaıta jasaýǵa múmkindik berdi.
– Qorǵannyń tonalyp ketkenine qaramastan, patshaıym kıiminiń úlgisin sýretshi Qalıolla Ahmetjan jasap shyqty. Konýs tárizdi tájdiń shirindilerine qarap, saqtyń shoshaq bórigin jasaǵan. Bórik bolǵanymen, bul kádimgi qazaqtyń sáýkelesi sııaqty. Al tabylǵan áshekeıler arheologterdiń boljamy boıynsha bas kıimge jabystyrylǵan eken. Baıqasańyzdar, ortańǵy bir taýtekeniń basy eki denege bekitilgen. Qazba jumystary kezinde belgili bolǵandaı, taýteke aǵashtan oıylyp, betine altyn jalatylǵan, – deıdi mýzeıdiń tarıhshy mamany Alfııa Baqbaeva.
Aýyz toltyryp aıta keterlik qundy dúnıe mýzeıdiń sóresinde saq patshaıymynyń bir qarys órilgen shashy men ań terisinen tigilgen tonnyń qıqymy saqtaýly tur. Tonnyń qandaı ańnyń terisinen tigilgendigin ǵalymdar áli zerttep jatyr.
Shyǵys Qazaqstan oblysy
