- Oblysta koronavırýs indetine qarsy vaksına salý bastaldy. «Spýtnık V» vaksınasynyń 1450 dozasy aımaqtaǵy tórt emdeý mekemesine taratyldy. Alǵashqy kúni vaksına 40 adamǵa salyndy. Olardyń jaǵdaıy dárigerdiń qadaǵalaýynda. Jalpy, ekpe saldyrǵannan keıin dene qyzýy kóterilýi múmkin. Eger temperatýra 37 gradýsqa jetse, parasetamol nemese «Ibýprofen» dárisin ishý kerek. Al dene qyzýy 39 gradýstan assa, dárigerge júgingen jón. Biz ekpe salardan buryn adamdardyń densaýlyǵyn tolyq tekserýden ótkizemiz jáne ekpeden keıin de birshama ýaqyt jiti baqylaımyz. Ázirge oblysta ekpe salǵannan keıin qandaı bir teris áser nemese dárigerdiń kómegine júginý tirkelgen joq. Taǵy bir baıqaǵanymyz, adamdarda ekpe alýǵa deıin qorqynysh údep, qan qysymynyń aýytqýy bolyp jatty. Árıne, buǵan da túsinistikpen qaraýymyz kerek. О́ıtkeni, koronavırýsqa qarsy ekpe álem boıynsha tuńǵysh ret qoldanysqa endi, turǵyndardyń kóńilinde kúdik te, alań da bolýy zańdy, - deıdi oblystyq densaýlyq saqtaý basqarmasynyń basshysy О́mirzaq Nııazbekov.
Qazir oblystyń 4 aýdanynda egý jumysy júrip jatyr. Búginge deıin aımaqtaǵy juqpaly aýrýlar aýrýhanalary, jedel medısınalyq járdem qyzmeti, reanımasııa bólimsheleri, aýrýhanalardyń qabyldaý bólmeleriniń dárigerleri men sanıtarlyq qyzmet mamandary egilgen. Mindetti ekpe alatyndar sanatynda 11 192 medısına qyzmeteri bar. Sondaı-aq, oblystyń shalǵaı óńirindegi turǵyndarǵa ekpe salý maqsatynda 12 jyljymaly brıgada iske kirisken eken. Vaksına salynǵan qutylardy tasymaldaý úshin syıymdylyǵy 253 lıtr bolatyn 11 termokonteıner arnaıy satyp alynypty. Munan bólek, turǵyndar arasynda koronavırýsqa qarsy ekpe salý jumysynyń tıimdiligi men qaýipsizdigi jaıynda túsindirme jumysy júrip jatyr.
- Buǵan deıin sanıtarlyq-epıdemıologııalyq baqylaý departamentiniń mamandary aýdandardaǵy medısına qyzmetkerlerine koronavırýs ınfeksııaǵa qarsy vaksınasııa algorıtmi, vaksınalardy saqtaý, júrgizilgen egýlerdi esepke alý boıynsha semınar ótkizgen bolatyn. Qazirge deıin 491 medısına qyzmetkeri dáris tyńdap, 474 dáriger attestattaldy, – deıdi oblystyq sanıtarlyq epıdemıologııalyq baqylaý departamenti basshysynyń orynbasary Ashat Sharapıev.
Aıtpaqshy, alǵashqy kúni erikti túrde ekpe saldyrǵandar arasynda oblys ákiminiń eki orynbasary men densaýlyq saqtaý basqarmasy basshysynyń orynbasary jáne oblystyq sanıtarlyq epıdemııalyq basqarmasy basshysynyń orynbasary bolǵan edi. Búginde olardyń jaǵdaıy qalypty, dáriger qyzmetine júginbegen. Laýazymdy tulǵalar óz qyzmetterin jalǵastyryp jatyr. Máselen, koronavırýsqa ekpeni oblys boıynsha birinshi saldyrǵan oblys ákiminiń orynbasary Batyrjan Baıjumanov (sýrette) jumys baby boıynsha jıyn ótkizip, tıisti mindetin tolyq atqarýda. Ol búgin de aýdan ákimderiniń onlaın esep berý jıyndaryna qatysqan.
Sondaı-aq, erikti túrde ekpe alǵandar tiziminde áriptesterimiz de bar. Alǵashqy bolyp oblystyq «Ognı Alataý» gazetiniń qyzmetkeri Janar Myqtybaeva «Spýtnık V» vaksınasyn saldyrdy. Biz jýrnalıstke habarlasyp, jaǵdaıyn suraǵan edik.
- Vaksına aldym. Úsh kún boıy dárgerlerdiń baqylaýynda boldym. Eshqandaı keri áseri baıqalmady Jumysymdy istep júrmin. Árıne, kóńilimde indetten týǵan úreı bar-dy. Men ony jeńdim. Osy kúdik adamdardyń ekpe alýyna da keri áser etip turǵandaı. Jerlesterimdi ekpe salý arqyly indetti tolyq jeńip, qalypty tirshilikke oralatyn kúnniń jaqyn qalǵanyna sendirgim keledi, - dedi áriptesimiz.
