Ras, bul 1960 jyldardan, ıaǵnı Buqtyrma sý qoımasy salynǵan ýaqyttan beri sheshilmeı kele jatqan kúrmeýi qıyn másele edi. Ásirese kúrshimdikter jaz shyqsa, eski paromnyń toqtamaýyn tileıtin. Jel turyp, kól beti tolqysa, kemeler de qańtarylyp qalady. Ondaıda jolaýshylar jaǵada túneıdi nemese Katonqaraǵaı, Altaı aýdandary arqyly júzdegen shaqyrymdy aınalyp ótýge májbúr bolady. Al qystyń kúni muz oıylyp, sý túbine ketken kólikter qanshama?! Kólikten buryn osy ótkelde kóptegen adamnyń ómiri de qıylǵan. Endi sátin salsa, bul qıynshylyqtardyń bári artta qalady.
Kúni keshe Kúrshimniń kúre tamyry ispetti kópirdiń qurylysy resmı túrde bastaldy. Jaǵalaýda ersili-qarsyly aýyr tehnıkanyń gúrili estilgende, jergilikti turǵyndar bórikterin aspanǵa atty. Kópir qurylysyna sener-senbesin bilmeı júrgen eldiń qýanyshy qoınyna syımady. Qurylys basynda «bismillá» dep qurban shalyp, qurylysshylarǵa sáttilik tilesti bári. Kóptiń kóldeı tilegi qabyl bolsa, úsh jyldan keıin halyq Kúrshimge kópir arqyly qatynaıdy. Shekara shebindegi aýyldardyń da áleýeti artady.
Kópir qurylysyna kirisken «OblShyǵysJol» JShS dırektorynyń orynbasary Aıdar Mamıevtiń aıtýynsha, qazirgi ýaqytta geodezııalyq, elektr jelisin tartý jumystary júrip jatyr. Sonymen qatar aýyr tehnıkalardyń júrýi úshin arnaıy jol salynady. Ázirshe, alǵashqy jumystarǵa 5 júk kóligi, 2 býldozer, 2 greıder tartylǵan. Odan bólek, kópir qurylysyn júrgizetin jumysshylar úshin 250 oryndyq jataqhana men qurylys qalashyǵy boı kóteredi. Jalpy jobanyń quny 32 mlrd teńgeni qurap otyr. Al Quıǵan aýylynyń tusynan shyǵatyn kópirdiń uzyndyǵy – 1300 metr.
