«Ekpeni birinshi kezekte ınfeksııany juqtyrý qaýpi joǵary medısına qyzmetkerleri – juqpaly aýrýlar aýrýhanalarynyń personaly, jedel járdem, reanımasııa bólimi, aýrýhanalardyń qabyldaý bólimderi, emhanalar men sanıtarlyq-epıdemıologııalyq qyzmet mamandary alyp jatyr. Vaksınasııalanǵan azamattar ózderin jaqsy sezinedi. Ekpe alǵan dárigerler – vaksınasııanyń qajettiligin biletin tájirıbeli mamandar» dep málimdedi Batys Qazaqstan oblystyq densaýlyq basqarmasy basshysynyń mindetin atqarýshy Arman Qalıbekov.
5 aqpan kúni Batys Qazaqstan oblysy epıdemıologııalyq jaǵdaıdy baǵalaý matrısasy boıynsha «sary aımaqqa» jyljydy. Búginge deıin óńirde barlyǵy 11 395 adam indet juqtyrǵan. Onyń ishinde 5 376 adamda aýrý sımptomsyz ótken.
Sońǵy derekterge qaraǵanda ınfeksııa juqtyrǵandardyń 81,3%-y, ıaǵnı 9 267 adam saýyǵyp shyqty. 199 adam koronavırýstyq ınfeksııadan kóz jumdy.Búginde karantındik stasıonarlarda 26 naýqas jatyr. Al ınfeksııalyq stasıonarda 291 adam emdelýde. Aýrýhanalardyń tolymdylyǵy 50,2%-dy quraıdy.
- Infeksııalyq stasıonarlardaǵy reanımasııalyq bólimderde qazir 20 naýqas emdelýde. Olardyń 80 paıyzy – 60 jastan joǵary adamdar. Oryn tapshylyǵy joq, - deıdi basqarma basshysy.
О́ńirde epıdemııa kúsheıgen jaǵdaıda paıdalaný úshin qosymsha 2008 tósek-oryndyq rezervtik qor daıyndalǵan. Olardyń 1233-i ınfeksııalyq stasıonarlarda, 775-i karantındik stasıonarlarda. Sondaı-aq árbir emhanada COVID-19 jáne pnevmonııa sımptomdary bar pasıentterdi, sozylmaly aýrýlary bar pasıentterdi, sondaı-aq kórsetkishter boıynsha júkti áıelder men balalardy úıde baqylaý úshin 124 mobıldi brıgada jumys jasap júr. Mobıldi brıgadalar táýligine orta eseppen 280 márte jolǵa shyǵady, sonyń 70-i – COVID-19 boıynsha shaqyrý eken.
Batys Qazaqstan oblysy boıynsha sanıtarlyq-epıdemıologııalyq baqylaý departamenti basshysynyń orynbasary Nurlybek Mustaevtyń aıtýynsha, óńirde jyl basynan beri 2174 adam koronavırýstyq ınfeksııamen aýyrǵan. Bul naýqastarmen qarym-qatynasta bolǵan 2782 adam anyqtalyp, medısınalyq baqylaýǵa alynǵan. Al sońǵy aptada ótken aptamen salystyrǵanda aýrýshańdyq 3,7%-ǵa tómendegen.
- Koronavırýs ınfeksııasyn juqtyrǵandardyń 41,5 paıyzy, ıaǵnı 903-i – jumys isteıtin adamdar. Sondaı-aq 461 zeınetker, 150 oqýshy, 89 muǵalim, 39 stýdent, balabaqshaǵa barmaıtyn 38 sábı vırýs juqtyrǵany anyqtaldy, - deıdi Nurlybek Mustaev.
Bıylǵy oqý jyly bastalǵaly COVID-19 mektepte dástúrli formatta oqıtyn 164 oqýshyda, qashyqtyqtan oqıtyn 177 oqýshyda, barlyǵy 341 oqýshyda anyqtalǵan eken. Al 3 toqsan bastalǵaly, ıaǵnı 11 qańtardan bastap 127oqýshy COVID-19 juqtyrǵan. Olardyń 49-y – dástúrliformatta, 78-i – qashyqtyqtan oqıtyndar. Oral qalasynda jáne aýdandarda 31 mekteptiń 42 synyby sanıtar dárigerleriniń qaýlysymen karantınge jabylǵan.
Zerthanalarda qańtar aıynyń basynan beri barlyǵy 62974 zertteý júrgizilgen.
Árıne, qaýipti vırýsty memlekettik shekaradan ótkizbeý máselesi de qatań qadaǵalaýda. Jyl basynan beri Reseı Federasııasymen aradaǵy shekaradan 28465 adam ótken. Shekaradan ótýshilerden PTR synamasy talap etiledi, ol bolmaǵan jaǵdaıda anyqtamasyz jolaýshylar 3 táýlikke karantındik stasıonarǵa ornalastyrylady. Sondaı-aq halyqaralyq júk tasymaldaryn júzege asyratyn júrgizýshilerge de osy talap qoıylady. 5276 júrgizýshide anyqtama joq bolyp, PTR ádisimen COVID-19 test alynǵanda, 7 adamda vırýs bar ekendigi anyqtalǵan.
О́ńirde karantın talaptaryna sáıkes kópshilik jıyndar ótkizýge tıym salynyp, saqtyq sharalaryn kúsheıtýge mindettelgen bolatyn. Bul talaptardy monıtorıngtik toptar qadaǵalaıdy. Jyl basynan beri mundaı toptar 608 márte reıd júrgizip, 5874 nysandy teksergen eken. Sonyń 22-sinde ereje buzýshylyq anyqtalyp, 49 hattama toltyrylǵan. Tártip buzýshylarǵa salynǵan aıyppuldyń kólemi – 2 902 415 teńge.
