Qańtar aıynyń basynan bastap Qaraǵandy oblysy Sátbaev qalalyq polısııa bólimine qala turǵyndarynan belgisiz azamatshaǵa aldanyp qalǵandyqtary týraly aryzdar túse bastady. Alaıaq jábirlenýshilermen áleýmettik jeli arqyly baılanysqa shyǵyp, utymdy bızneske aqsha quıýǵa úgittegen. Ol jábirlenýshilerdi qomaqty tabys tabýǵa bolatyndyna sendirgen.
Alaıaqtyń aıtqanyna sengen turǵyndar ózderiniń jıǵan-tergen aqshalaryn belgisiz bireýge jiberip otyrǵan. Biri alaıaqqa 100-200 myń teńge jiberse, endi biri 500-700 myń jibergen. Sátbaevtyń taǵy bir turǵyny alaıaqqa 2 mıllıon 700 myń teńge aqsha jiberip, san soǵyp qalǵan. Keıin, ústeme aqsha bylaı tursyn, óz aqshalaryn ala almaı qalǵan turǵyndar polısııaǵa aryz jazǵan.
Atalǵan faktiler boıynsha Qazaqstan Respýblıkasy Qylmystyq kodeksiniń 190-babyna (Alaıaqtyq) sáıkes qylmystyq is qozǵaldy. Polısııa qyzmetkerleri atalǵan qylmysty ashý jáne kúdiktini anyqtaý boıynsha aýqymdy jumystar atqardy. Júrgizilgen jedel-izdestirý is-sharalarynyń nátıjesinde polısııa qyzmetkerleri osy iske qatysy bar degen kúdikpen О́skemen qalasynyń 24 jastaǵy turǵynyn anyqtap, ustady.
Tergeý áreketteri barysynda alaıaq azamatshanyń osyndaı alaıaqtyqtyń 18 faktisine qatysy bar ekeni belgili boldy. Onyń arbaýyna tek Sátbaev qalasynyń turǵyndary ǵana emes, Nur-Sultan qalasynyń turǵyndary da túsken. Jábirlenýshilerge keltirilgen shyǵyn kólemi shamamen 10 mıllıondy qurady.
